Մաքսային օրենսդրության բարեփոխման վերաբերյալ հայկական ՏՏ-ընկերությունների առաջարկությունների քննարկմամբ զբաղվող աշխատանքային խումբ կստեղծվի

ԵՐԵՎԱՆ, 31 հուլիսի. /ԱՌԿԱ/. Մաքսային օրենսդրության բարեփոխման  վերաբերյալ հայկական ՏՏ-ընկերությունների առաջարկությունների քննարկման նպատակով կստեղծվի աշխատանքային խումբ: Համապատասխան առաջարկություն է հնչեցրել ՀՀ վարչապետ Տիգրան Սարգսյանը նախօրեին Տեղեկատվական տեխնոլոգիաների զարգացման աջակցության խորհրդի նիստի ընթացքում:

Վարչապետի առաջարկության համաձայն՝ աշխատանքային խումբը կստեղծվի ՏՏ-ընկերությունների և մաքսային կառույցների միջև առավել արդյունավետ համագործակցության հաստատման նպատակով:

Ինչպես նիստի ընթացքում նշել է Տեղեկատվական տեխնոլոգիաների ձեռնարկությունների միության (UITE) գործադիր տնօրեն Կարեն Վարդանյանը, ՏՏ-հատվածի ներկայացուցիչները մշակել են մաքսային բարեփոխումների փաթեթ, որոնց նպատակը մաքսային ոլորտում ռիսկերի կրճատումն է:

Ավելին՝ նրա խոսքերով՝ ամփոփվել է մտահոգություն առաջացնող հարցերի ցանկը, որոնց շուրջ մաքսային կառույցի հետ մինչ օրս համապատասխան բանակցություններ են ընթանում:

Տեղեկատվական տեխնոլոգիաների ձեռնարկությունների միությունը (UITE) և ՏՏ-հատվածի ներկայացուցիչները մշակել են մաքսային բարեփոխումների փաթեթ, որոնց նպատակը մաքսային ոլորտում ռիսկերի կրճատումն է: ՏՏ-հատվածի ներկայացուցիչների գնահատմամբ՝ գոյություն ունի չորս հիմնական հարց՝ խնդիրներ ներկրման, արտահանման, վերարտահանման և սարքավորումների փոխանակման ժամանակ:

Սակայն ինչպես պնդում են մաքսային կառույցների ներկայացուցիչները, նշված խնդիրներից ոչ բոլորն իսկապես գոյություն ունեն, ՏՏ-հատվածի ներկայացուցիչների կողմից ներկայացված խնդիրներից շատերը կարելի է լուծել Մաքսային օրենսգրքի գործող հոդվածներից օգտվելու շնորհիվ:

Տեղի ունեցած քննարկումների արդյունքում որոշում է ընդունվել ստեղծել համագործակցության աշխատանքային խումբ, որի կազմում կներառվեն ՏՏ-հատվածի և Պետական եկամուտների կոմիտեի ներկայացուցիչները:

ՀՀ վարչապետին առընթեր Տեղեկատվական տեխնոլոգիաների աջակցության խորհրդի շրջանակում ստեղծվող խումբը կմշակի վերջնական առաջարկներ, որոնք կներկայացվեն կառավարության քննարկմանը:-0-

Ծանոթացեք լուրերին առաջինն ու քննարկեք դրանք մեր Telegram-ում

22:19 31.07.2009