ԵՐՐՈՐԴ ԱՄԵՆԱՄՅԱ DIGITEC BUSINESS ՑՈՒՑԱՀԱՆԴԵՍ-ՖՈՐՈՒՄՆ է ՄԵԿՆԱՐԿԵԼ ԵՐԵՎԱՆՈՒՄ

ԵՐԵՎԱՆ, 9 հունիսի, /ԱՌԿԱ /. Բիզնեսում տեղեկատվական տեխնոլոգիաների կիրառման հարցերին նվիրված երրորդ ամենամյա DigiTec Business ցուցահանդես-ֆորումն է չորեքշաբթի մեկնարկել Երևանում:

«Սա արդեն ավանդական միջոցառում է, որը ցուցադրում է իր արդյունավետությունն ու բացառիկ վայր է շփման և պայմանավորվածությունների ձեռքբերման, շուկայի ձեռքբերումների հետ ծանոթանալու համար և հասարակության համար ՏՏ զարգացման ազդակ է», - նշեց ՀՀ վարչապետ Տիգրան Սարգսյանը միջոցառման բացման ժամանակ:

Վարչապետն ընդգծեց, որ կառավարությունը փորձում է աջակցել DigiTec ֆորումին, քանի որ այն իրական արդյունքներ է տալիս, ինչի մասին վկայում են ֆորումի արդյունավետ աշխատանքն ու նրա մասնակիցների թվի աճը:

DigiTec Business ֆորումի հիմնական նպատակն է աջակցել տեղեկատվական և հեռահաղորդակցական տեխնոլոգիաների (ՏՀՏ) ներդրմանը տնտեսության տարբեր ոլորտներում:

Ցուցահանդես-ֆորումին ներկայացված են բիզնեսի կառավարմանը, գործընթացների ավտոմատացմանը, վաճառքի խթանմանը, ինչպես նաև տնտեսության արդիականացմանը կամ մասնագիտական խորհրդատվություն ստանալուն ուղղված վերջին ՏՏ-լուծումները:

Միջոցառմանը մասնակցում են շուրջ 40 տեղական և օտարերկրյա ընկերություններ, որոնք ներկայացնում են իրենց լուծումները ֆինանսաբանկային, զբոսաշրջային, առևտրի, շինարարության, տրանսպորտի և դեղագործության ոլորտներում:

Ցուցահանդես-ֆորումի առանձին անկյունում ներկայացված են Հարավ-Արևելյան Եվրոպայի ՏՏ-ընկերությունները, որոնք ներկայացնում են, մասնավորապես, Ալբանիան, Սլովենիան, Մոլդովան, Մակեդոնիան, Բուլղարիան, Բոսնիա և Հերցեգովինան, Ռումինիան, Հոլանդիան, Կոսովոն, որոնք կանցկացնեն իրենց շնորհանդեսները:

Ֆորումի հետ զուգահեռ անցկացվելու է ցուցահանդես՝ տեղեկատվական և հեռահաղորդակցական տեխնոլոգիաները ներկայացնող շուրջ 40 ընկերությունների մասնակցությամբ, ինչպես նաև ՏՏ-ընկերությունների վերջին լուծումներին և ծառայություններին նվիրված կոնֆերանսներ և սեմինարներ, կանցկացվի Start up-ֆորումը, որին կմասնակցի շուրջ 10 ընկերություն:

Առաջին անգամ DigiTec Business ֆորումն անցկացել է Հայաստանում 2008 թ.-ի հունիսի 26-27-ը՝ Նորարարություններին նվիրված Microsoft-ի ֆորումի հետ համատեղ: Ֆորումի ժամանակ ներկայացված էին Հայաստանի բիզնեսում տեղեկատվական տեխնոլոգիաների կիրառման հնարավորությունները:

DigiTec Business ցուցահանդես-ֆորումի կազմակերպիչն է Տեղեկատվական տեխնոլոգիաների ձեռնարկությունների միությունը (UITE): Ֆորումն անցկացվում է ՀՀ էկոնոմիկայի նախարարության աջակցությամբ՝ ՀՀ վարչապետի բարձր հովանու ներքո: Միջոցառման տեղեկատվական հովանավորներն են «ԱՌԿԱ» լրատվական գործակալությունը, «Նովոստի-Արմենիա» միջազգային լրատվության գործակալությունը:-0-

 

Ծանոթացեք լուրերին առաջինն ու քննարկեք դրանք մեր Telegram-ում

19:58 09.06.2010