Հայաստանը դեռ պատրաստ չէ 5G ցանցին. Եսայան
ԵՐԵՎԱՆ, 23 հունիսի./ԱՌԿԱ/. Հայաստանն այսօրվա դրությամբ պատրաստ չէ 5G ցանցի օգտագործմանը։ «ԱՌԿԱ» գործակալությանը նման կարծիք հայտնեց Team Telecom Armenia ընկերության գլխավոր տնօրեն Հայկ Եսայանը։
«5G–ն իր մոդուլյացիայով չի տարբերվում 4G-ից։ Այսինքն, ցածր հաճախականությունների վրա, որոնք ապահովում են մեծ ծածկույթ և թույլ են տալիս օգտագործել ավելի քիչ բազային կայաններ, 5G ցանցը ոչնչով ավելի լավ չէ ներդրումների տեսակետից, բացի այդ այսօր այն ավելի թանկ է։ Շուկան այսօր պատրաստ չէ ավելի շատ վճարել», – ասաց նա։
Եսայանը նաև պարզաբանեց, որ Երևանում 5G ծածկույթ ապահովելու համար կպահանջվի առնվազն երկու տարի։
Խոսելով այն մասին, թե ինչ կարիքների են ուղղվելու IPO–ի միջոցով ներգրավված միջոցները` նա պարզաբանեց, որ դրանք կօգտագործվեն օպտիկամանրաթելային կապի, ինչպես նաև 4G և 5G ցանցերի ծածկույթի որակը լավացնելու համար։
«Տելեկոմ Արմենիա» ԲԲԸ–ն (ապրանքանիշը` Team Telecom Armenia) նախատեսում է տեղաբաշխել 8մլրդ 240մլն ընդհանուր արժեքով 40մլն բաժնետոմս։ Տեղաբաշխումը կիրականացվի այս տարվա հունիսի 7–ից հոկտեմբերի 31–ը։–0–
Ծանոթացեք լուրերին առաջինն ու քննարկեք դրանք մեր Telegram-ում
12:52 23.06.2023