«Ջոկեր», «1917», «Իռլանդացին». ինչպես են օգտագործվել այդ ֆիլմերի անվանումները վնասաբեր ծրագրերում
ԵՐԵՎԱՆ, 26 փետրվարի./ԱՌԿԱ/. Կինոնորույթները գրավում են ոչ միայն շարքային դիտողների, այլև չարագործների ուշադրությունը, որոնք դրանցով քողարկում են վնասաբեր ծրագրերը։
«Կասպերսկի» ընկերությունը վերլուծել է, թե ֆիշերները և վնասաբեր ծրագրերի հեղինակները որքան հաճախ են օգտագործել «Օսկար-2020»-ի անվանակարգված 9 ֆիլմերի անվանումները, նշվում է «Կասպերսկի» ընկերության Հայաստանի ներկայացուցչության հաղորդագրության մեջ։
Ընդհանուր առմամբ, փորձագետներն աշխարհում հայտնաբերել են ավելի քան 20 ֆիշինգային կայք, որոնք օգտատերերին գայթակղում էին 2019-ի աղմուկ հանած պրեմիերաները դիտելու հնարավորությամբ, և նաև այդ ֆիլմերի անվանումների հետ կապված 925 վնասաբեր ֆայլ (նիշք)։
Նորույթներն անվճար դիտելու առաջարկ անող ֆիշինգային կայքերի օգնությամբ չարագործները հավաքում էին օգտատերերի անձնական և ֆինանսական տվյալները։
Բացի այդ, փորձագետները հաշվարկել են երկու հետևյալ պայմանների բավարարող վնասաբեր ֆայլերի քանակը. դրանք հայտնվել են տվյալ 9 ֆիլմերից յուրաքանչյուրի պաշտոնական պրեմիերաներին հետևած չորս շաբաթների ընթացքում և ներառել դրանց անվանումները։ Պարզվել է, որ չարագործների շրջանում ամենամեծ ժողովրդականությունը վայելել է «Ջոկեր»-ը (304 վնասաբեր ֆայլ), «1917»-ը (215 վնասաբեր ֆայլ) և «Իռլանդացին» (179 վնասաբեր ֆայլ)։
«Չարագործները հետևում են արդիական միտումներին, այդ թվում՝ նաև կինոինդուստրիայի։ Նրանք իրենց թակարդներն են դնում ինչպես աղմկոտ պրեմիերայից քիչ առաջ, այնպես էլ՝ դրանից անմիջապես հետո՝ հանդիսատեսի հետաքրքրության գագաթնակետին։ Հնարավոր ռիսկերից խուսափելու համար մենք կինո սիրողներին խորհուրդ ենք տալիս օգտվել միայն պաշտոնական սթրիմինգային հարթակներից»,- մեկնաբանում է «Կասպերսկի» ընկերության հակավիրուսային փորձագետ Անտոն Իվանովը։
Ֆիլմի փոխարեն սարքեր վնասաբեր ծրագրեր չներբեռնելու համար օգտատերերին խորհուրդ է տրվում ստուգել ֆիլմերի պրեմիերաների պաշտոնական ամսաթվերը և չվստահել ֆիլմը մինչև վարձույթ դուրս գալը դիտելու առաջարկներին, մինչև ֆայլը ներբեռնելը ստուգել դրա ընդլայնումը. այն կարող է լինել .avi, .mkv կամ .mp4, բայց ոչ մի դեպքում .exe, օգտագործել կիբեռսպառնալիքներից բազմակողմանի պաշտպանության հուսալի լուծում։–0–
Ծանոթացեք լուրերին առաջինն ու քննարկեք դրանք մեր Telegram-ում
13:52 26.02.2020
