Հայաստանի սոցիալական մեդիան արտացոլում է մարդկանց քաղաքական հայացքները. ԱՄՆ դեսպան

ԵՐԵՎԱՆ, 11 հունիսի. /ԱՌԿԱ/. Հայաստանի սոցիալական մեդիան արտացոլում է մարդկանց քաղաքական հայացքները, «ԱՌԿԱ» գործակալությանը տված հարցազրույցում հայտարարել է Հայաստանում ԱՄՆ դեսպան Ջոն Հեֆֆերնը նախօրեին Երևանում անցկացված BarСamp  ոչ պաշտոնական համաժողովի շրջանակներում:

«Մարդիկ Հայաստանում շփվում են Facebook-ում կամ Twitter-ում, և սոցիալական մեդիայի միջոցով նրանք կարող են դրևսորել իրենց քաղաքական հայացքներն ու տրամադրությունները»,- ասաց ամերիկացի դիվանագետը, ավելացնելով, որ սոցցանցերը մարդկանց միաբանման հզոր միջոց են: 

Նա միաժամանակ ասել է, որ սոցիալական մեդիան մարդու գիտակցության վրա ազդեցության արդյունավետ գործոն է: 

«Տեղեկատվական այն հզոր հոսքում, որ լցնում է Ինտերնետը, միշտ չէ, որ ստացվում է որոշել, թե որ տեղեկությունն է ճշմարիտ, իսկ որը` ոչ: Բայց, ակնասկած, ցանկացած տեղեկություն, անկախ իր հավաստիությունից, կարող է ազդել մարդու և նրա գործողությունների վրա»,- ասաց Հեֆֆերնը: 

BarCamp-ը 2005 թվականին ԱՄՆ-ի Սիլիկոնային հովտում առաջացած միջոցառումների նոր ձևաչափ է, որ շատ արագ ճանաչում գտավ ողջ աշխարհում: 

BarCamp-ի` հաշվով չորրորդ համաժողովը կայացավ հունիսի 8-9-ին Երևանում և հավաքեց տեղեկատվական տեխնոլոգիաների ոլորտի 1500 ներկայացուցիչների` ծրագրավորողների, ինժեներների, բլոգերների, օնլայն լրագրողների և սոցիալական ցանցերի ակտիվիստների: 

Միաժամանակ նախկին միության տարածքում առաջին անգամ BarCamp-ն անցկացվել է 2007 թվականի հոկտեմբերին` Կիևում: Այն հավաքել է ավելի քան 300 մասնակիցներ Ուկրաինայից, Բելառուսից, Ղազախստանից, Լատվիայից, Ռուսաստանից, Ղրղզստանից, Լեհաստանից և տարածաշրջանի այլ երկրներից, անցկացվել է 45 շնորհանդես: -0-