«Յանդեքսը» արմատապես փոխում է իր ինտերֆեյսը և որոնման կանոնները համացանցում
ԵՐԵՎԱՆ, 16 մայիսի. /ԱՌԿԱ/. «Յանդեքսը» 2013 թվականի մայիսի 16-ին ներկայացրել է իր «Օստրովա» նոր որոնողական հարթակը, հայտնում է cnews.ru–ն։
Հարթակը նախորդներից տարբերվում է նրանով, որ որոնման արդյունքները
ներկայացնում է ինտերակտիվ հարցերի տեսքով։ Ենթադրվում է, որ համացանցից օգտվողներն ինտերակտիվ ձևակերպումների միջոցով կկարողանան փոխգործակցել փնտրվող ռեսուրսի հետ անմիջապես պատասխանի արդյունքների էջում։
Որոնողական համակարգն իր կորպորատիվ բլոգում ավիատոմսերի գրանցման օրինակ է բերել`եթե ավիատոմսերի կայք եք փնտրում և հետո անցնում գրանցման գործընթացին, ապա «Օստրովա» հարթակում կարող եք առցանց գրանցման դաշտը լրացնել առանց կայք մտնելու։
«Յանդեքսը» բոլոր կայքերի տերերին հրավիրում է մասնակցել որոնման արդյունքների ձևավորմանը` «Յանդեքսի» որոնման մեջ ինտերակտիվ «կղզիների» միջոցով ներկայացնելով իրենց ռեսուրսների կարևոր տեղեկությունը։
Այսպես, կինոթատրոնների կայքերը կարող են որոնման մեջ հեռարձակել ֆիլմերի ծանուցումները, իսկ բժշկական կենտրոնները` բժիշկի մոտ հերթագրվելու ձևաթղթերը։
Որոնման բետա–տարբերակը հասանելի կլինի 2013 թվականի հուլիսին, սակայն ռեսուրսների տերերի և մշակողների փորձարարական հարթակն աշխատում է արդեն հիմա։ Հրապարակված է թղթաբանությունը և փորձարարական ձևը «Յանդեքսում» սեփական «կղզի» ստեղծելու համար։
Հետաքրքիր է, որ «Յանդեքս» բլոգի մեկնաբաններն արդեն հասցրել են հակասական կարծիքներ հայտնել սպասվող նորամուծությունների վերաբերյալ։ Թեպետ բլոգի ընթերցողները հավանություն են տվել «Յանդեքսի» նախաձեռնությանը, որոշ մեկնաբաններ էլ հասցրել են դժգոհել նոր հարթակից։
Արդեն մտավախություններ են հնչել, թե «կայքերի տերերը իրենց կոնտենտն անվճար կտան «Յանդեքսին»` կորցնելով գովազդից ստացվող գումարները, «նման որոնում ներմուծելու դեպքում խուճապ կսկսի», քանի որ որոնողական օպտիմալացման ստանդարտ մեթոդները առաջվա պես չեն աշխատի, և «ամեն բան արվում է տրաֆիկը «Յանդեքս» ռեսուրսներում պահելու համար, որն անտարբեր է այն հարթակների տերերի ճակատագրի նկատմամբ, որոնց տրաֆիկները «կփլուզվեն»։-0-
Ծանոթացեք լուրերին առաջինն ու քննարկեք դրանք մեր Telegram-ում
14:29 16.05.2013