ԱՄՆ ազգային հետախուզության տնօրեն. Համացանցում մենք հետևում ենք միայն օտարերկրացիներին և ԱՄՆ–ի սահմաններից դուրս ապրողներին

ԵՐԵՎԱՆ, 7 հունիսի. /ԱՌԿԱ/. ԱՄՆ կառավարությունը համացանցում հետևում է օտարերկրացիներին և ԱՄՆ–ի սահմաններից դուրս ապրողներին, հայտարարել է ԱՄՆ ազգային հետախուզության տնօրեն Ջեյմս Կլեպերը, հաղորդում է  Associated Press–ը։

Ինչպես գրում է РБК–ն, նա իր հայտարարությունում ընդգծել է նաև, որ ամերիկյան և բրիտանական ԶԼՄ–ներում հայտնված մանրամասներն էլեկտրոնային վերահսկման և հեռախոսազրույցների գաղտնալսման մասին «բազմաթիվ սխալներ ունեն», բայց  մեկնաբանություններ չի արել։

Ջ.Կլեպերի խոսքով, հատուկ դատարանը յուրաքանչյուր 90 օրը մեկ անգամ գնահատում է հեռախոսազրույցների գաղտնալսման ծրագրի գործունեությունը։ Բացի այդ, դատարանը թույլ է տալիս կառավարությանը լսելու բաժանորդների զրույցները և ստանալ նրանց անձնական տվյալները միայն այն դեպքում, եթե «կան կասկածելի վարքի էական ապացույցներ»։

ԶԼՄ–ներում ԱՄՆ ինտերնետ–անվտանգության ծրագրի մասին տվյալների արտահոսքն ազգային հետախուզության տնօրենի կողմից համարվել է «տխուր և դատապարտման արժանի» ակտ, որը հարվածում է երկրի անվտանգությանը։

ԱՄՆ հատուկ ծառայությունների կողմից ամերիկացիների անձնական տեղեկության հասանելիություն ստանալու մասին սկանդալը բռնկվել է 2013 թվականի հունիսի 5–ին, երբ բրիտանական ԶԼՄ–ներում ռեպորտաժներ են հայտնվել այն մասին, որ Վաշինգտոնը Verizon բջջային կապի ընկերությունից պահանջել է բաժանորդների հեռախոսազրույցների մանրամասների հասանելիություն 2013 թվականի ապրիլի վերջից մինչև հուլիսի սկիզբ։ ԱՄՆ սենատում նշել են, որ պահանջն օրինական է եղել, բայց հատուկ ծառայությունները խնդրել են սենատորների համար փակ լսումներ անցկացնել։

Ավելի ուշ ամերիկյան մի շարք ընկերություններ, ներառյալ Google–ը Apple–ը և Facebook–ը, հերքել են այն տեղեկությունը, որ հատուկ ծառայություններին իրենց սերվերների անսահմանափակ հասանելիություն են տրամադրել։ -0-

Ծանոթացեք լուրերին առաջինն ու քննարկեք դրանք մեր Telegram-ում

13:27 07.06.2013