Օնլայն ծանոթությունների արդյունքում ավելի երջանիկ ամուսնություններ են գրանցվում, հայտնում են գիտնականները
ԵՐԵՎԱՆ, 4 հունիսի. /ԱՌԿԱ/. Ամերիկացի ընտանեկան զույգերը, ովքեր առաջին անգամ հանդիպել են օնլայն–ծանոթությունների ծառայությունների միջոցով, իրենց ավելի երջանիկ են զգում, քան «ավանդական տարբերակով ծանոթացած» ընտանիքների ամուսինները, և ավելի հազվադեպ են ամուսնալուծվում վերջինների համեմատ, գրում է ՌԻԱ Նովոստին` ներկայացնելով Proceedings of the National Academy of Sciences ամսագրում հրապարակած հոգեբանական հոդվածը։
«Ամուսնության ընթացքը կախված է մի շարք հանգամանքներից։ Ամուսինների հանդիպման վայրն ու բնույթը միայն դրանցից մեկն է, և դրա ազդեցությունը ոչ միշտ է նկատվում, իսկ ընդհանուր ելքի համար արված ներդրումը շարունակում է փոքր մնալ։ Այնուամենայնիվ, մեր հետազոտության արդյունքները հուսադրող են` հաշվի առնելով փոփոխությունները Միացյալ Նահանգների հասարակությունում առկա ծանոթությունների ավանդույթները»,– ասել է Ջոն Կապոչոն (John Cacioppo) Չիկագոյի համալսարանից (ԱՄՆ)։
Կապոչոն և նրա գործընկերները եկել են այս եզրահանգման` վերլուծելով ամերիկյան ամուսնությունների և ամուսնալուծությունների պատմությունը, որը նրանց է տրամադրել 2000 թվականից գործող խոշորագույն օնլայն–ծանոթությունների ծառայություններից մեկը կառավարող eHarmony ընկերությունը։ Հոգեբանների խոսքով, այդ կորպորացիան չի միջամտել հետազոտության ընթացքին, իսկ դրա տվյալները ստուգվել են անկախ փորձագետների և Ամերիկյան բժշկական ասոցիացիայի կողմից ընդունված մեթոդաբանությամբ
Ընդհանուր առմամբ հետազոտողները վերլուծել են 19 հազար ընտանեկան զույգերի կյանքի տվյալները, որոնց մոտ կեսը` 45 տոկոսը, իր ապագա ամուսնուն կամ կնոջը հանդիպել է ծանոթությունների կայքերի միջոցով։ Նրանց խոսքով, այդ երկու խմբերի մարդկանց մշակութային բազան և բարեկեցությունը զգալիորեն տարբերվել է` միջին տարիքի ապահովված մարդկանց գերակշռմամբ «օնլայն»–ընտանիքներում։
Պարզվում է, որ ցանցում ծանոթացած ամերիկացիների ընտանիքներն ավելի հազվադեպ են (26%–ով) բաժանվել, քան սովորական ընտանեկան զույգերը։ Բացի այդ, «հասարակության նման հատվածներում» ամուսիններն իրենց ընդհանուր առմամբ ավելի երջանիկ են զգացել, քան նրանց «օֆֆլայն»–ընտանիքների մրցակիցները Գիտնականները կարծում են, որ նման ծանոթությունների հաջողված լինելը պայմանավորված է այն հանգամանքով, որ օնլայն–ծանոթությունների կայքերի օգտագործողները մեծ ծավալի տեղեկություն են տեղադրում իրենց մասին, ինչը թույլ է տալիս նրանց ապագա կեսերին ավելի լավ ճանաչել անգամ առաջին հանդիպումից առաջ։ -0-
Ծանոթացեք լուրերին առաջինն ու քննարկեք դրանք մեր Telegram-ում
13:05 04.06.2013