Սոցցանցերը կարող են նպաստել ընտանիքում ներդաշնակությանը, կարծում է Բենեդիկտոս 16 –րդ Պապը
ԵՐԵՎԱՆ, 25 հունվարի. /ԱՌԿԱ/. Սոցիալական ցանցերը կարող են ամրապնդել մարդկանց շփումները և արդյունավետորեն աջակցել ընտանիքներում ներդաշնակության ստեղծմանը, կարծում է Բենեդիկտոս 16–րդ Հռոմի Պապը, հաղորդում է digit.ru–ն։
Կաթոլիկ աշխարհի հոգևոր առաջնորդի կարծիքով` դա հնարավոր է, երբ սոցցանցերում տարվում են երկխոսություններ և բանավեճեր, որտեղ պահպանվում են մասնավոր կյանքի անձեռնմխելիությունը, ճշմարտության նկատմամբ հավատարմությունը և զրուցակցի նկատմամբ հարգանքը։
«Թվային աշխարհը ոչ զուգահեռ, ոչ էլ պարզապես վիրտուալ աշխարհ է, բայց դա բազմաթիվ մարդկանց, հատկապես երիտասարդների առօրյա կյանքի մի մասն է»,– նշել է Բենեդիկտոս Պապը սոցիալական հաղորդակցություններին նվիրված իր ամենամյա ուղերձում։
Հռոմի Պապի խոսքով` կապերը, որոնք ձեռք է բերում օգտագործողը սոցիալական ցանցերում, կարող են ընկերության վերածվել։ Հռոմեա-կաթոլիկ եկեղեցու ղեկավարը նշել է, որ սոցիալական ցանցերի զարգացումն իր ավանդն ունի նոր «ագորայի»` քաղաքային բաց հրապարակի ստեղծման մեջ, որտեղ մարդիկ կարող են մտքեր, տեղեկություն և կարծիքներ փոխանակել, և որտեղ կարող են «նոր հարաբերություններ և հասարակական ձևեր ծնվել»։
Բենեդիկտոս 16–րդը, ով ապրիլին կդառնա 86 տարեկան, նախորդ տարվա վերջին սկսել է սեփական միկրոբլոգը վարել, և Twitter–ում իր առաջին հաղորդագրությունն է թողել դեկտեմբերի 12–ին։ Ներկայում Հռոմի Պապի հաղորդագրությունները կարելի է ընթերցել ինը լեզուներով` անգլերեն, իսպաներեն, իտալերեն, ֆրանսերեն, գերմաներեն, պորտուգալերեն, լեհերեն, արաբերեն և լատիներեն։ -.0-
Ծանոթացեք լուրերին առաջինն ու քննարկեք դրանք մեր Telegram-ում
14:52 25.01.2013
