Նախորդ գիշեր 20 հայկական կայք են կոտրել. փորձագետ
ԵՐԵՎԱՆ, 19 մարտի. /ԱՌԿԱ/. Նախորդ գիշեր մոտ 20 հայկական կայք են կոտրել, «ԱՌԿԱ» գործակալությանը հայտնեց տեղեկատվական անվտանգության փորձագետ, հայտնի բլոգեր Սամվել Մարտիրոսյանը:
Ըստ նրա, ինտերնետ-ռեսուրսները կոտրել է այն նույն խումբը, հավանաբար, ադրբեջանական, որը մի քանի օր առաջ գրոհել էր շուրջ քսան հայկական կայքերի վրա:
«Նախօրեին կոտրվել է տասը կայք, իսկ գիշերվա ընթացքում կոտրվել է ևս մի քանիսը: Հայտնի կայքերի թվում, բացի «Հայաստանի Հանրապետություն» թերթի պաշտոնական էլեկտրոնային տարբերակից, կոտրել են նաև bjni.am ընկերության էջը»,- ասաց Մարտիրոսյանը:
Նա միաժամանակ հայտնեց, որ ավելի վաղ ադրբեջանական ԶԼՄ-ները հայտնել են օմբուդսմենի՝ ombuds.am կայքը կոտրելու մասին, սակայն ներկայում այն նորմալ գործում է:
Մարտիրոսյանի կարծիքով՝ կամ օմբուդսմենի կայքը կոտրելու մասին լուրերն ադրբեջանական հերթական ապատեղեկատվությունն էր, կամ կայքն արագ վերականգնվել է:
Փորձագետն ընդգծեց նաև, որ Հայաստանի պետկառույցները և բանկային համակարգի կայքերն ամենաբարձր մակարդակի պաշտպանվածություն ունեն:
Կիրակի և երկուշաբթի լույս գիշերը կոտրել են, մասնավորապես, UNDP/GEF նախագծի (ՄԱԿ-ի զարգացման ծրագիր/Գլոբալ բնապահպանական հիմնադրամ) «Ազգային ներուժի գնահատում», Global Bridge կրթական կենտրոնի, «Զարգացում և ինտեգրում» ոչ կառավարական կազմակերպության, «Հույսի կամուրջ» հաշմանդամների իրավունքների պաշտպանության կազմակերպության կայքերը:
Մոտավորապես երկու շաբաթ առաջ ադրբեջանցի ցանցահենները հայկական 20 կայք էին կոտրել, որոնց թվում էին նաև Մայր Աթոռ Սուրբ Էջմիածնի, Խոսքի ազատության պաշտպանության կոմիտեի, Հայաստանի հրեական համայնքի, «Valex-group» ընկերության կայքերը:--0-
Ծանոթացեք լուրերին առաջինն ու քննարկեք դրանք մեր Telegram-ում
19:40 19.03.2012