Հայաստանում ինտերնետի թափանցման մակարդակը 56,9% է կազմում. հետազոտություն
ԵՐԵՎԱՆ, 8 հոկտեմբերի. /ԱՌԿԱ/. Հայաստանում ինտերնետի թափանցման մակարդակը կազմում է 56.9 տոկոս, երեքշաբթի լրագրողներին հայտնեց «Նոյ Ֆիրմա» հետազոտական ընկերության ղեկավար Գագիկ Սարգսյանը։ Ընկերությունը հարցում էր անցկացրել երկրում ինտերնետի թափանցման մակարդակի վերաբերյալ։
Միաժամանակ, Երևանում ինտերնետի թափանցման ցուցանիշն ավելի բարձր է` 60.5 տոկոս, իսկ մարզերում, համապատասխանաբար` 48 տոկոս։ Ինչ վերաբերում է մարզերի ակտիվությանը, ապա թափանցման առավել բարձր տոկոս է գրանցվել մայրաքաղաքին մոտ մարզերում` Կոտայք` 58.6 տոկոս և Արարատ` 53.1 տոկոս։
«Տարբերությունը շատ մեծ է, ինչը պայմանավորված է օպտիկամանրաթելային ցանցի անցկացման հարցերով, ինչպես նաև գնային քաղաքականությամբ, ի դեպ, մենք ինտերնետի թափանցման ավելի ցածր ցուցանիշներ էին սպասում երկրում»,– ասաց Սարգսյանը։
Բարձր ցուցանիշը, ըստ նրա, ավելի շատ պայմանավորված է ոչ թե հետաքրքրությամբ և պահանջարկով, այլ անհրաժեշտությամբ, մասնավորապես, մարզերի հարցվածների հիմնական մասը` 48 տոկոսը, Skype–ի օգտագործողներ են, ովքեր ինտերնետ են միացնում արտերկրում գտնվող բարեկամների հետ շփվելու անհրաժեշտությունից ելնելով։
Նա նշեց նաև, որ օգտագործողների մոտ ներկայում օգտագործվող ռեսուրսների հարաբերական պրիմիտիվիզմ ու կենտրոնացում է նկատվում, որտեղ առաջին տասնյակում են լրատվական կայքերը, ժամանցային ռեսուրսները, չատերը, սոցցանցերն ու պոռնոկայքերը։
«Ինտերնետ–ռեսուրսների լայն տեսականուց հայ օգտագործողները կիրառում են շատ սահմանափակ ռեսուրսներ, ընդ որում, եթե նշվում են լրատվականները, ապա միանգամից 10 ռեսուրս, ինչը վկայում է լրատվական դաշտի նկատմամբ վստահության բացակայության մասին»,– ասաց Սարգսյանը։
Ըստ նրա, հետաքրքիր է այն փաստը, որ եթե առաջ ինտերնետ–պրովայդերներն ավելի շատ էին, ապա հիմա նախկինում խոշոր համարվող օպերատորները դուրս են մղվում նոր ընկերությունների կողմից, որոնք են, օրինակ, Ucom–ը և Ռոստելեկոմը։
«Մարզերում ինտերնետի զարգացման ներդրումների անհրաժեշտություն կա, տարածաշրջանում օպերատորների գործունեության զարգացման միտումները հանգեցնում են նրան, որ շուտով կարող են մնալ 4-5 խոշոր օպերատորներ, որոնք նաև կառաջարկեն այլ ծառայություններ` հեռուստատեսության, հեռախոսակապի»,– նշեց հետազոտողը։
Հետազոտությունն անցկացվել է 2012 թվականի դեկտեմբերից մինչև 2013 թվականի մարտը ներառյալ։ Հարցմանը մասնակցել է ավելի քան 1500 մարդ։ -0-
Ծանոթացեք լուրերին առաջինն ու քննարկեք դրանք մեր Telegram-ում
14:25 08.10.2013