Հայաստանի բնակիչների շուրջ 70%–ը գրանցված է սոցիալական ցանցերում. հետազոտություն

ԵՐԵՎԱՆ, 20 նոյեմբերի. /ԱՌԿԱ/. Հայաստանի բնակիչների շուրջ 70 տոկոսը գրանցված է սոցիալական ցանցերում, չորեքշաբթի ասաց «Ռեգիոն» հետազոտական կենտրոնի տնօրեն Լաուրա Բաղդասարյանը` ներկայացնելով «Facebook–ը Հայաստանում. օգտատերերը և կիրառումը» հետազոտությունը։
 
Facebook–ի օգտատերերի թիվը Հայաստանում բավական ակտիվ է աճում` ամսական 20–30 հազար մարդով  և ըստ վերջին տվյալների` արդեն հասել է 560 հազարի։ Միաժամանակ «Օդնոկլասնիկի» սոցիալական ցանցը` 775 հազար, իսկ «Վկոնտակտեն»` 310 հազար։

«Հայաստանում միայն Facebook սոցիալական ցանցից օգտվում է բնակչության 19 տոկոսը`գրեթե երկրի յուրաքանչյուր հինգերորդ բնակիչը կամ ինտերնետ օգտատերերի թվի 42 տոկոսը»,– ասաց Բաղդասարյանը։     

Ըստ նրա` հայ օգտատերերի շրջանում Facebook–ի ճանաչվածությունը և լսարանի աճը դրված է ցանցի բազմաբնույթ գովազդի վրա` սկսած ԶԼՄ–ների մեջբերումներից մինչև դրանցում օգտատերերի ծանոթների և հարազատների ներկայությունը։

Միաժամանակ նա նշեց, որ շատ օգտատերեր մյուս սոցիալական ցանցերում շփվելու փորձ ունեն, սակայն կենտրոնացել են Facebook–ի վրա, քանի որ այս ցանցում առավել լուրջ գործընթացներ են տեղի ունենում, այն առավել արդյունավետ է քաղաքական և բիզնես ասպեկտում, ինչպես նաև առավել հետաքրքիր է դառնում հասարակ քաղաքացիների համար։  

Օրինակ` շատ ընկերություններ իրենց արտադրանքը գովազդում և առաջադրում են այդ թվում Facebook–ի հաշվին, իսկ տեղեկատվական ռեսուրսները հաճախ տեղեկատվություն են վերցնում իրենց նյութերի համար։

«Facebook–ը լավ հարթակ է տեղեկատվության ակտիվ փոխանակման, տարբեր բողոքի ակցիաներ անցկացնելու համար, որոնք հետագայում իրական իրադարձությունների են վերածվում»,– ասաց Բաղդասարյանը։

Նա նշեց նաև, որ հետազոտության համաձայն, օգտատերերի հիմնական մասը սոցիալական ցանցում իրեն դրսևորում է ինչպես իրական կյանքում։

Միաժամանակ օգտատերերի երկու երրորդ մասն ակտիվ է իրեն պահում` օգտագործելով ինտերակտիվի բոլոր հնարավորությունները` Like, Share, Comment, իսկ օգտատերերի մնացած մեկ երրորդ մասն այդ հնարավորությունները կիրառում է միայն բացառիկ դեպքերում։

Հետազոտությունն անցկացվել էր 2013թ.–ի սեպտեմբեր–հոկտեմբեր ամիսներին Facebook–ի 150 օգտատերերի շրջանում, ովքեր ներկայացնում են քաղաքացիների հինգ հիմնական կատեգորիաները` հասարակական քաղաքական գործիչներ, բիզնեսի ներկայացուցիչներ, լրագրողներ, արվեստի գործիչներ, հասարակ  քաղաքացիներ։

Հետազոտությունն անցկացվել էր «Ռեգիոն» հետազոտական կենտրոնի կողմից` ԵԱՀԿ երևանյան գրասենյակի աջակցությամբ` Հայաստանում միջազգային չափանիշներին համապատասխան ընտրական գործընթացի կատարելագործման ծրագրի շրջանակներում։ –0–

Ծանոթացեք լուրերին առաջինն ու քննարկեք դրանք մեր Telegram-ում

16:27 20.11.2013