Հայաստանն աշխարհում 9-րդն է մոբայլ բանկային տրոյացիների գրոհների ենթարկվածների ցուցանիշով
Երևան, 11 դեկտեմբերի./ԱՌԿԱ/. 2019-ի երրորդ եռամսյակում Հայաստանն աշխարհի երկրների շարքում 9-րդ տեղն է գրավել մոբայլ բանկային տրոյական ծրագրերի գրոհների ենթարկված օգտատերերի բաժնի ցուցանիշով, հայտնել է «Կասպերսկի» ընկերության Հայաստանի ներկայացուցչության մամուլի ծառայությունը։
Այն կազմել է 0,1% և երկրորդ եռամսյակի համեմատ, չի փոփոխվել:
Եթե այդ վնասաբեր ծրագրերը 2019-ի երկրորդ եռամսյակում գրոհել են Վրաստանի օգտատերերի 0,08%-ին, ապա երրորդ եռամսյակում այդ ցուցանիշը նվազել է մինչև 0,06%։ Այդ ցուցանիշներն Ադրբեջանում կազմել են, համապատասխանաբար, 0,07% և 0,08%։ Հուլիս-սեպտեմբերին մոբայլ բանկային տրոյական ծրագրերն ամենից շատ գրոհել են ռուսաստանցի օգտատերերին՝ 0,30%։
2019-ի երրորդ եռամսյակում Հայաստանում մոբայլ վնասաբեր ծրագրերի գրոհների ենթարկվել է օգտատերերի 1,86%-ը, Վրաստանում այդ ցուցանիշը կազմել է 1,17, իսկ Ադրբեջանում՝ 3,8%։ Երկրորդ եռամսյակում դրանք գրոհել են հայաստանցի օգտատերերի 2,08%-ին, Վրաստանում՝1,67, և Ադրբեջանում՝ 4,05%-ին։ Այս մասին են վկայում «Կասպերսկի» ընկերության տվյալները, որոնց համաձայն, հուլիս-սեպտեմբերին մոբայլ սպառնալիքներն ամենից շատ գրոհել են Իրանի օգտատերերին՝ 52,68%:
Մոբայլ վնասաբեր ծրագրերից պաշտպանության համար փորձագետների կողմից առաջարկվող միջոցներից են` հավելվածներ ներբեռնելը միայն վստահելի աղբյուրներից և կողմնակի աղբյուրներից ծրագրերի տեղադրման հնարավորությունն անջատելը սարքի կարգավորումներում, ինչպես նաև համակարգի ու հավելվածների մշտական թարմացումը։
Խորհուրդ է տրվում չանցնել ոչ վստահելի հղումներով և չբացել կասկածելի ֆայլերը SMS-ներում, էլեկտրոնային փոստում, մեսենջերներում, սոցիալական ցանցերում և բրաուզերներում։
Մոբայլ օգտատերերը համացանցում պետք է զերծ մնան որևէ մեկին անհատական և բանկային տվյալներ տրամադրելուց, հատկապես նրանց, ովքեր «խնդրում » են դա անել ի պատասխան «շահավետ» առաջարկների։
Ցանկացած տրոյացուց և այլ վնասաբեր ծրագրերից պաշտպանվելու համար անհրաժեշտ է տեղադրել հուսալի հակավիրուս, որը կկանխարգելի դրանց տեղադրումը և վնասաբեր կայքեր այցելությունը։ -0-
Ծանոթացեք լուրերին առաջինն ու քննարկեք դրանք մեր Telegram-ում
13:51 11.12.2019