Ադրբեջանցի ցանցահենների գրոհների երկրորդ ալիքը սպասվում է փետրվարի վերջին. փորձագետ
ԵՐԵՎԱՆ, 21 հունվարի. /ԱՌԿԱ/. Հայկական կայքերի վրա ադրբեջանցի ցանցահենների գրոհների երկրորդ ալիքը սպասվում է փետրվարին վերջին` Սումգայիթյան իրադարձությունների տարելիցին, կարծում է տեղեկատվական անվտանգության փորձագետ Սամվել Մարտիրոսյանը։
1988 թվականի փետրվարի 26-29-ին ադրբեջանական իշխանությունների փաստացի աջակցությամբ և ԽՍՀՄ ղեկավարության թողտվությամբ Ադրբեջանական ԽՍՀ Սումգայիթ քաղաքում տեղի են ունեցել հայերի զանգվածային ջարդեր, որոնք իրենց վայրենի ու դաժան կատարմամբ ցնցել են համաշխարհային հանրությանը:
«Ադրբեջանցի հաքերները, հաշվի առնելով այսպես–կոչված «սև հունվարի» իրադարձությունները, նախօրեին կոտրել են մոտ 60 հայկական կայք, և հիմա, ամենայն հավանականությամբ, հարկավոր է գրոհների երկրորդ ալիքը սպասել փետրվարի 26–28–ն ընկած ժամանակահատվածում», – երեքշաբթի կայացած մամուլի ասուլիսի ժամանակ ասաց Մարտիրոսյանը` նշելով, որ նման երևույթներ նկատվում են ամեն տարի։
Նրա խոսքով` ադրբեջանցիների գործողություններին ի պատասխան` հայ հաքերները հունվարի 21–ի գիշերը կոտրել են 13 ադրբեջանական կայք` նվիրելով դա ԼՂՀ ՊԲ կրտսեր սերժանտ Արմեն Հովհաննիսյանի հիշատակին, ով զոհվել է ադրբեջանական դիվերսիոն խմբի չեզոքացման ժամանակ, որը փորձում էր ներթափանցել ԼՂՀ տարածք։
«Կոտրված կայքերում հայ հաքերները տեղադրել են սպանված զինծառայողի լուսանկարները», –նշեց փորձագետը։
Մարտիրոսյանը նաև ավելացրեց, որ ամեն տարի նկատվում է Ադրբեջանի կողմից հաքերական գրոհների նվազման որոշակի միտում։
«Նախորդ տարի «սև հունվարին» հաքերները գրոհեցին մոտ 300 հայկական կայք։ Տարվա ընթացքում ընդհանուր առմամբ կոտրվել է մոտ 1000 հայկական կայք, սակայն տարեցտարի այդ թիվը նվազում է», – ասաց Մարտիրոսյանը` պատասխանելով «ԱՌԿԱ» գործակալության հարցին։
1990 թ.–ի հունվարի 13–20–ը Բաքվում տեղի ունեցած հայկական ջարդերի հետևանքով գազանաբար սպանվել են հարյուրավոր հայեր։ Ջարդերը լավ կազմակերպված էին, հանցագործներն ունեին հայերի ցուցակներն ու նրանց հասցեները։ Բաքվի ջարդերի դադարեցման համար խորհրդային զորքեր են մտցվել։
Փորձագետն ընդգծեց, որ Հայաստանի պետական կառույցների բոլոր կայքերը լավ պաշտպանված են և գրոհի չեն ենթարկվել, այն դեպքում, երբ Լեռնային Ղարաբաղի Հանրապետության կայքերի պաշտպանվության մակարդակը բավականին ցածր է։
«Ինտերնետ հանրություն» ՀԿ–ի փոխնախագահ Գրիգոր Սաղյանն իր հերթին նշեց, որ հաքերական գրոհների են ենթարկվել հիմնականում նույն ընկերության մշակած կայքերը։
«Սովորաբար հաքերներին ավելի հեշտ է կոտրել մեկ մշակողի կայքերը, քանի որ դրանք մշակվում են միասնական սկզբունքով», – պարզաբանեց Սաղիյանը։
Նա նաև նշեց, որ կայքերը հաճախ մշակումից հետո ոչ մեկի կողմից չեն վերահսկվում, ինչի հետևանքով դրանք հեշտ է կոտրել։–0–
Ծանոթացեք լուրերին առաջինն ու քննարկեք դրանք մեր Telegram-ում
16:13 21.01.2014
