Ամերիկացիները ծանրաբեռնել են Google որոնողական համակարգը Կանադա արտագաղթելու մասին հարցերով
ԵՐԵՎԱՆ, 9 նոյեմբերի. /ԱՌԿԱ/. Ամերիկացիները ծանրաբեռնել են Google որոնողական համակարգը արտագաղթելու մասին հարցերով այն բանից հետո, երբ, նախագահական ընտրությունենրի ձայների նախնական հաշվարկով, հանրապետական թեկնածու Դոնալդ Թրամփը զբաղեցրեց առաջատարի դիրքը։
Ինչպես հաղորդում է Ինտերֆաքսը, հղում անելով The Daily Telegraph–ին, Google–ն արձանագրել է «արտագաղթում» և «ինչպե՞ս արտագաղթել Կանադա» բառերով ու արտահայտություններով որոնումների կտրուկ աճ։
Կանադայի միգրացիոն ծառայությունը ևս չի «դիմացել» Կանադա արտագաղթել ցանկացողների հոսքի աճին և դարձել է անհասանելի օգտատերերի համար։
Հանրապետական կուսակցությունից ԱՄՆ նախագահի թեկնածու Դոնալդ Թրամփը հաղթեց նախագահական ընտրություններում, հաղորդում է Associated Press գործակալությունը։
«Դոնալդ Թրամփն ընտրվեց ԱՄՆ նախագահ», – նշվում է գործակալության հաղորդագրության մեջ։
Politico հրատարակությունը հաղորդում է, որ Թրամփը հավաքեց ընտրական կոլեգիայի 276 անդամների ձայնը, իսկ Հիլարի Քլինթոնը` 218 անդամների ձայնը։ Հանրապետականի օգտին քվեարկել է շուրջ 56,9 մլն մարդ, Քլինթոնի օգտին` 55,8 մլն։
Վերջինը Վիսկոնսին և Միչիգան նահանգներում Թրամփի հաղթանակի մասին տվյալներն էին։ Մի շարք նահանգներում, սակայն, ձայների հաշվարկը չի ավարտվել, բայց դա չի ազդի ընտրությունների արդյունքների վրա։–0–
Ծանոթացեք լուրերին առաջինն ու քննարկեք դրանք մեր Telegram-ում
12:51 09.11.2016