Գիտնականները կարողանում են հասկանալ մարդու սեռական կողմնորոշումը ըստ Facebook–ի «լայքերի»
ԵՐԵՎԱՆ, 12 մարտի. /ԱՌԿԱ/. Ինֆորմատիկայի ոլորտի բրիտանացի մասնագետները մշակել են մի ալգորիթմ, որը թույլ է տալիս անսխալ որոշել Facebook–ի օգտագործողների տարիքը, սեռական կողմնորոշումը, հետաքրքրություները և IQ–ն` ըստ սոցիալական ցանցի մյուս մասնակիցներին արված «լայքերի» և հրապարակումների, գրում է ՌԻԱ Նովոստին` հղում անելով Proceedings of the National Academy of Sciences ամսագրում հրապարակված հոդվածին։
«Ես ինձ համարում եմ նոր տեխնոլոգիաների, այդ թվում` Facebook–ի ակտիվ օգտագործող։ Այսպես, ինձ դուր են գալիս գրքերի և լուրերի ավտոմատ ցուցումները։ Մյուս կողմից, ես կարող եմ պատկերացնել իրավիճակներ, որտեղ նույն տվյալներն ու ալգորիթմներն օգտագործվում են ձեր քաղաքական հայացքների կամ սեռական կողմնորոշման որոշման համար։ Այդ փաստն ինքնին կարող է ետ պահել մարդկանց նոր տեխնոլոգիաների օգտագործումից և անվստահություն առաջացնել օգտագործողների և վեբ–ընկերությունների միջև»,– հայտնել է Քեմբրիջի համալսարանից (Մեծ Բրիտանիա) Միխայիլ Կոսինսկին։
Կոսինսկին և նրա գործընկերները փորձն անցակցրել են Facebook–ում` ունենալով ավելի քան 58 հազար օգտագործողների աջակցությունը։ Գիտնականները ստացել են «լայքերի» և այլ տեղեկության հասանելիություն այդ օգտագործողների էջերում, ինչպես նաև ոչ մեծ անանուն անկետավորում են անցկացրել կամավորների շրջանում։
Այնուհետև գիտնականները միավորել են վիճակագրությունը և դրա օգնությամբ մշակել են հատուկ ալգորիթմ, որն ընդունակ է ընդհանուր գծեր գտնել Facebook–ի որոշ էջերում «լայք» դրած օգտագործողների միջև։ Կասմելով մի քանի հարյուր կամավորների սոցիալական «դիմանկարները»` հոդվածի հեղինակները դիմել են նրանց և համեմատել կանխատեսումներն իրականության հետ։
Հետազոտողներին զարմացրել է այն փաստը, որ գործնականորեն բոլոր արդյունքները ճիշտ են եղել` ծրագիրը գուշակել է օգտագործողների ռասան 95 տոկոս դեպքերում, նրանց սեռական կողմնորոշումը` 88 տոկոս դեպքերում, իսկ քաղաքական նախընտրությունները` 85 տոկոս դեպքերում։ Բացի այդ, գիտնականների ալգորիթմը կարողացել է որոշել նաև այլ հետաքրքիր տեղեկություններ, այդ թվում` IQ–ն ծնողների ամուսնալուծվելու ժամանակը։ Այդ տվյալները կարող են օգտագործվել սպամերների և խարդախների կողմից շահ ունենալու համար, ինչը պետք է դրդի օգտագործողին ավելի զգույշ մոտենալ տվյալների գաղտնիությանը սոցցանցերում։ -0-
Ծանոթացեք լուրերին առաջինն ու քննարկեք դրանք մեր Telegram-ում
11:56 12.03.2013
