Հայկական կայքերը ավտոմատ կերպով կսկանավորվեն` կիբերանվտանգությունը ստուգելու նպատակով. փորձագետ
ԵՐԵՎԱՆ, 9 հոկտեմբերի. /ԱՌԿԱ/. Հայկական կայքերն ավտոմատ կերպով կսկանավորվեն` կիբերանվտանգությունը ստուգելու նպատակով, «ԱՌԿԱ» գործակալության հետ զրույցում ասաց «Ինտերնետ հանրություն» հասարակական կազմակերպության նախագահ Իգոր Մկրտումյանը։
Ըստ նրա, հայկական կայքերի ավտոմատ սկանավորման գործարկումը թույլ կտա բացահայտել դրանց թույլ տեղերը, որոնք հեշտությամբ կարող են ցանցահենային գրոհների զոհ դառնալ, որից հետո թերությունների վերաբերյալ առաջարկությունները կներկայացվեն ռեսուրսների սեփականատերերին` դրանք վերացնելու համար։
«Հայկական կայքերի դրությունն այժմ կարելի է վատ անվանել, քանի որ վեբ կայքերի մշակողները հաճախ ոչ բարձր որակավորման մարդիկ են, ովքեր չգիտեն այն խնդիրներն ու խոցելի կետերը, որոնց միջոցով հնարավոր է արագ կոտրել կայքը»,– ասաց Մկրտումյանը։
Նա նշեց, որ հենց այդ խոցեկլի տեղերն էլ օգտագործում են ադրբեջանական ցանցահենները, ինչը անվտանգության ցածր մակարդակի հետևանք է։
Ըստ փորձագետի, այդ խոցելիության արդյունքում տարեկան շուրջ 1500 հայկական վեբ կայքեր գրոհների են ենթարկվում ցանցահենների կողմից, առավելապես` ադրբեջանական, ինչը մտահոգություն է առաջացնում, քանի որ հետևանքները բավական խնդրահարույց են և անհրաժեշտ է այն կանխել։
Ըստ նրա, կայքերի ավտոմատ սկանավորման նախագծի իրականացումը նախատեսվում է ներմուծել դրամաշնորհներից ստացված միջոցներով, հավանաբար` Համաշխարհային ինտերնետ հանրության աջակցության շնորհիվ։ –0–
Ծանոթացեք լուրերին առաջինն ու քննարկեք դրանք մեր Telegram-ում
15:53 09.10.2013