Նորաստեղծ կայքը բացահայտում է անձնական տվյալների արտահոսքի առկայությունը
ԵՐԵՎԱՆ, 10 դեկտեմբերի. /ԱՌԿԱ/. Համացանցում արդեն գործում է «Have I been pwned?» նոր ռեսուրսը, որի միջոցով յուրաքանչյուր օգտագործող կարող է ստուգել`թե չարագործներն այս կամ այն կայքում կոտրել են իր գրառումները, թե ոչ, հաղորդում է rbcdaily–ն։
«Ինտերնետ տեխնիկական կենտրոնի» հաղորդմամբ, հետազոտող Տրոյ Հանթն է հայտարարել haveibeenpwned.com վեբ–կայքի գործարկման մասին, որում հավաքված են վերջին ժամանակներում խոշորագույն կիբերգրոհներից տուժած օգտագործողների տվյալները։ Կայքը որոնման հնարավորություն ունեցող տվյալների բազա է։ Օգտագործողը պարզապես պետք է միայն մուտքագրի իր էլեկտրոնային փոստի հասցեն, և ռեսուրսը կհայտնի, թե արդյոք կոտրվել է այդ հասցեով որևէ գրառում։
«Տրոյ Հանթն ընդգծում է, որ հավաքել և ամփոփել է ինտերնետում, այդ թվում` նաև հենց ցանցահենների հրապարակած տեղեկությունը, սակայն սկզբունքորեն չի պահպանել գաղտնաբառերը` սահմանափակվելով միայն գրառումներով և էլեկտրոնային փոստի հասցեներով»,– ասվում է «Ինտերնետ տեխնիկական կենտրոն» կայքի հաղորդագրության մեջ։
Ինչպես Twitter–ում հայտնել է ինքը Հանթը, առաջին իսկ օրը կայքը մշակել է 152 հազար որոնողական հարցում։ Միաժամանակ, մուտքագրված հասցեների 32 տոկոսն ասոցացվում էր կոտրված գրառումների հետ։
Ավելի վաղ` նոյեմբերի սկզբին, ՆԳՆ–ն առաջարկել էր խստացնել պատիժը համակարգչային տեղեկության` մեծ վնասով կամ շահադիտական նպատակներով անօրինական հասանելիության համար։ Համապատասխան օրինագիծը տեղադրված է իրավական ակտերի նախապատրաստման տեղեկության միասնական պորտալում։
Գործող օրենսդրության համաձայն, ցանցահենին կարող են բանտ նստեցնել առավելագույնը կես տարով։ Սակայն, ինչպես կարծում է գերատեսչությունը, համակարգչային տեխնոլոգիաների կիրառմամբ խարդախությունների թիվը վերջին ժամանակներում արագ աճում է։ Օրինակ, 2010 թվականին գրանցվել է վճարային փաստաթղթերի 2.9 հազար կեղծում, իսկ 2013 թվականի առաջին կիսամյակում` արդեն ավելի քան 3 հազար։ -0-
Ծանոթացեք լուրերին առաջինն ու քննարկեք դրանք մեր Telegram-ում
10:34 10.12.2013