«Օդնոկլասնիկին» գործարկում է սեփական առցանց–կինոթատրոնը
ԵՐԵՎԱՆ, 12 դեկտեմբերի. /ԱՌԿԱ/. РБК daily–ի աղբյուրները պատմել են, որ «Օդնոկլասնիկի» սոցիալական ցանցը մտադիր է սեփական առցանց–կինոթատրոնը զարգացնել։ Ցանցի պահոցում արդեն ավելի քան 30 սերիալ և հեռուստատեսային շոու կա։ Բացի այդ, «Օդնոկլասնիկին» համագործակցության պայմանավորվածություն ունի Yellow, Black and White ընկերության հետ, որը СТС հեռուստաալիքի համար սերիալներ է պատրաստում` «Խոհանոց», «Վերջին Մոհիկյանը»։
«Օդնոկլասնիկի» առցանց–կինոթատրոնը կաշխատի Pladform բաշխման համակարգի միջոցով, տեղյակ է Mail.Ru Group–ի РБК daily–ի աղբյուրը։ Ցանցից օգտվողներին հասանելի կլինեն ռուսական և արտասահմանյան սերիալներն ու ֆիլմերը։ Այժմ ցանցը տարածում է Yellow, Black and White ընկերության կոնտենտը, որն աշխատում է СТС, «Ռոսիա 1» հեռուստաալիքների հետ։ Կինոթատրոնի գործարկման պահից ցանցի օգտատերերին հասանելի կդառնան մի շարք հեռուստանովելների բոլոր սեզոնները։
«Օդնոկլասնիկիի» ներկայացուցիչները չեն հաստատել և չեն հերքել այդ տեղեկությունը` պարզաբանելով, որ աշխատում են այս տեսանյութերը զարգացնելու ուղղությամբ։ Օրինակ` երբ այս տարվա հուլիսին գործարկվեցին տեսաալիքները, ապա դա թույլ տվեց սոցիալական ցանցին ավելացնել դիտած հոլովակների քանակը։ Ըստ «Օդնոկլասնիկիի» հաշվարկների, այժմ օրական շուրջ 10 մլն օգտատեր 64 մլն տեսանյութ է դիտում։
«Այսօր մեր ուշադրության կենտրոնում են մեր տեսանյութերի ալիքները, մասնավորապես` սերիալների և ֆիլմերի։ Մենք շարունակում ենք բանակցություններ վարել համապատասխան ընկերությունների հետ, որպեսզի մշտապես ավելացնենք մեր տեսանյութերի ցանկը»,– РБК daily–ին մեկնաբանել է Mail.Ru Group փոխնախագահ, «Սոցիալական ցանցեր»–ի բիզնեսի ստորաբաժանման ղեկավար Իլյա Շիրոկովը։
Mail.Ru Group–ի մյուս կառույցը` «ՎԿոնտակտեն», կինոթատրոն չունի։ Պավել Դուրովի ցանցը դեռ բանակցում է իրավասու կազմակերպությունների հետ` սերիալների և ֆիլմերի օրինական ցուցադրման շուրջ։ Վերջերս «Ամեդիա» կինոընկերությունը, որը մի քանի սերիալի իրավունք ունի, ցանցում գործարկել է «Ամեդիատեկ» սեփական հավելվածը։ –0–
Ծանոթացեք լուրերին առաջինն ու քննարկեք դրանք մեր Telegram-ում
13:26 12.12.2013
