Հայ դպրոցականները sevanlake.am կայքի միջոցով կարող են ուսումնասիրել Սևանա լճի խնդիրները

ԵՐԵՎԱՆ, 20 մարտի. /ԱՌԿԱ/. ՀՀ–ում Ֆրանսիայի դեսպանատունը, Երևանի միջազգային ֆրանսիական դպրոցն ու «ԿԱԶԱ» շվեյցարական բարեգործական կազմակերպությունն ուրբաթ ներկայացրել են Սևանա լճի մասին տեղեկատվություն ներկայացնող նոր կրթական կայքը, որը կոչվում է sevanlake.am։

Ինչպես կայքի շնորհանդեսի ժամանակ նշեց ՀՀ–ում Ֆրանսիայի դեսպանատան տեխնիկական և գիտական հարցերով կցորդ Ալիս Լենան, կայքի գաղափարը պատկանում է դեսպանատանը, որը և ֆինանսավորել է ծրագիրը։ Կայքի դիզայնը մշակել է «ԿԱԶԱ» բարեգործական կազմակերպությունը։

«Նախագծի հիմնական նպատակն էր ստեղծել հատուկ գործիք, որն առկա խնդիրներին ծանոթանալու հնարավորություն կտա հայ դպրոցականներին, հնարավոր կլինի քննարկումներ կազմակերպել կայքի հատուկ հատվածում», – ասաց Լենան։

Դպրոցականները կայքում կկարողանան ծանոթանալ լճի մասին ընդհանուր տեղեկություններին, գոյություն ունեցող խնդիրներին, դրանց լուծման տարբերակների վերաբերյալ մասնագիտական կարծիքներին։ Կարող են քննարկումներ կազմակերպել, լուսանկարներ տեղադրել, ուղղել և ավելացնել տեքստեր։

Կայքում տեղադրված է նաև ինտերակտիվ խաղ, որի նպատակն է դպրոցականների շրջանում բարձրացնել Սևանա լճի մասին իրազեկության մակարդակը։

Սևանա լիճը Եվրոպայի և Ասիայի ամենամեծ բարձր լեռնային լճերից է, գտնվում է Հայկական լեռնաշխարհի սրտում` 1914 մետր բարձրության վրա։Երկայնքով` հյուսիս–արևմուտքից դեպի հարավ–արևելք, լիճը տարածվում է 70 կիլոմետր, իսկ ջրային հայելու մակերեսը հասնում է գրեթե 1500 քառակուսի կիլոմետրի։ Լիճը տարածաշրջանի խմելու ջրի գլխավոր ռեսուրսն է։ 2030 թվականին  լճի մակարդակը կհասնի օպտիմալ 1903.5 մետրի։

Սևանա լիճն ունի տարածաշրջանային մեծ նշանակություն։ Արդեն ապացուցվել է, որ լճի վիճակն անմիջական կապ ունի տարածաշրջանի բոլոր ջրային ռեսուրսների հետ։ Բնապահպանների գնահատականներով` լճի ջրի մակարդակի նվազումը կհանգեցնի կլիմայական փոփոխությունների, մասնավորապես` Հայաստանի կլիման կդառնա ավելի չոր, ինչպես նաև կպակասեն խմելու ջրի պաշարների ծավալները։ –0–

Ծանոթացեք լուրերին առաջինն ու քննարկեք դրանք մեր Telegram-ում

20:48 20.03.2015