ՀՀ արդարադատության նախարարը և ԱՄՆ դեսպանը դատական գործերի թվայնացման և էլեկտրոնային արխիվացման հարցեր են քննարկել
ԵՐԵՎԱՆ, 1 հունիսի. /ԱՌԿԱ/. Հայաստանի արդարադատության նախարար Հովհաննես Մանուկյանն Ամերիկայի Միացյալ Նահանգների արտակարգ և լիազոր դեսպան Ռիչարդ Միլսի հետ այսօր քննարկել է դատական գործերի թվայնացման և էլեկտրոնային արխիվացման համակարգի ներդրման խնդիրները, հաղորդում է գերատեսչության մամուլի ծառայությունը:
ՀՀ արդարադատության նախարարը ներկայացրել է նման համակարգ ունենալու նշանակությունը՝ մանրամասնելով համակարգի ստեղծման և գործարկման անհրաժեշտությունը արդարադատության մատչելիության և հանրային իրազեկման համատեքստում:
Հանդիպմանը քննարկվել են նաև կոռուպցիայի դեմ պայքարին ուղղված առաջնահերթությունների, ինչպես նաև Կոռուպցիայի դեմ պայքարի խորհրդի աշխատանքների հանրային իրազեկման և այլ հարցերում Միացյալ Նահանգների հետ հնարավոր համագործակցության հարցեր:
Իր հերթին ԱՄՆ դեսպան Ռիչարդ Միլսը վերահաստատել է Միացյալ Նահանգների կառավարության հանձնառությունը` նպաստելու արդարության և մարդու իրավունքների ոլորտներում իրականացվող բարեփոխումներին: -0-
Ծանոթացեք լուրերին առաջինն ու քննարկեք դրանք մեր Telegram-ում
17:46 01.06.2015