Հայալեզու .հայ (.hay) դոմենը կարող է աշխատել արդեն կես տարուց
ԵՐԵՎԱՆ, 21 նոյեմբերի. /ԱՌԿԱ/. Հայալեզու .հայ (.hay) դոմենը կարող է աշխատել արդեն կես տարուց, Facebook–ի իր էջում հայտնում է տեղեկատվական անվտանգության փորձագետ Սամվել Մարտիրոսյանը։ «Հայալեզու .հայ դոմենի գոտին հաստատվել է։ Մոտ կես տարուց արդեն հնարավոր կլինի գրանցել հայալեզու դոմենները»,– գրել է նա։ ICANN (Internet Corporation for Assigned Names and Numbers) միջազգային կազմակերպությունը հինգշաբթի դրական որոշում է կայացրել .հայ (.hay) դոմենի գրանցման երկրորդ փուլի վերաբերյալ։ Ինչպես նշվում է ICANN կայքում, այս պահին .հայ (.hay) դոմենը հաջողությամբ տեխնիկական և լեզվաբանական սկզբունքների (String Evaluation) ստուգման փուլ է անցել։ Ավելի վաղ հաղորդվել էր, որ «Ինտերնետ միություն» հասարակական կազմակերպությունը դեռս տարեսկզբին դիմել էր ICANN դոմենի գրանցման համար։ Ընդ որում` տարեսկզբին արդեն կատարվել է գրանցման առաջին փուլը։ Դոմենային անունը դեռևս չի ուղարկվել պատասխանատու մյուս կողմին, իրականացվել է միայն տառակապակցության նախապատվեր։ .հայ (.hay) դոմենի գրանցման վերջակետը պետք է դնի դեռևս ԱՄՆ առևտրի նախարարությունը գրանցման հարցման հավանության միջոցով, որից հետո «String Delegation»–ն ամբողջովին կիրականացվի։ Սեփական դոմեններ ունեն արդեն շատ երկրներ։ Վերջերս դոմենային .рф անունն օգտագործվում է Ռուսաստանում։ 2013 թվականի վերջի տվյալներով` .am դոմենային գոտում գրանցված է ավելի քան 21 հազար կայք։ -0-
Ծանոթացեք լուրերին առաջինն ու քննարկեք դրանք մեր Telegram-ում
17:15 21.11.2014