Facebook–ում հրապարակած հաղորդագրության համար բրիտանուհին 20 տարի ազատազրկման է դատապարտվել Իրանում
ԵՐԵՎԱՆ, 31 մայիսի. /ԱՌԿԱ/. Ինչպես հաղորդում է Independent բրիտանական թերթը, 47–ամյա Ռոյա Սոբերի Նեջաթ Նոբահտը դատապարտվել է 20 տարի ազատազրկման։ Նրան մեղադրում են «ազգային անվտանգության դեմ հանցագործություն կատարելու», ինչպես նաև «իսլամական սրբությունները վիրավորելու» մեջ, հաղորդում է ՌԻԱ Նովոստին։
Ձերբակալված կնոջ ամուսնու խոսքով` Իրանի իշխանությունները Ռոյայից խոստովանություն են կորզել ճնշում գործադրելու միջոցով։ Տղամարդը մտավախություն ունի, որ եթե նա գնա Իրան ևս մեկ անգամ, ապա նրան ևս կձերբակալեն։
Տուժածի ընտանիքին մոտ կանգնած աղբյուրները հայտարարում են, որ 20 տարվա դատավճռի վերաբերյալ տեղեկությունը կարող է ճիշտ չլինել, քանի որ դատարանից գրավոր հաստատում չի եղել։ Նրանց խոսքով` դատարանը դեռևս հրաժարվում է հաստատել տեղեկատվությունը, սակայն նրանք ակտիվորեն բացատրություններ են պահանջում։
Ապրիլին օտարերկրյա ԶԼՄ–ները հաղորդում էին, որ 2013 թ.–ի հոկտեմբերին Ռոյան իր ամուսնու հետ մեկնել է Իրան` ամուսնու բարեկամներին այցելելու համար։ Նա ձերբակալվել է Շիզարա օդանավակայանում։ Ձերբակալման պատճառը Facebook սոցցանցում Իրանի կառավարության մասին «ստորացուցիչ տեղեկատվություն» հրապարակելն է։ Մեծ Բրիտանիայի քաղաքացին իրանական ռեժիմը որակել է «չափազանց իսլամական»։ Կնոջ ամուսինը մտավախություն ուներ, որ նրան կդատապարտեն մահապատժի։
Վերջին վեց տարվա ընթացքում Ռոյա Սոբերի Նեջաթ Նոբահտն ամուսնու հետ բնակվում էր Անգլիայի Սթոքփորթ քաղաքում։ Զույգն ունի երկքաղաքացիություն (Իրան և Մեծ Բրիտանիա)։ Հաշվի առնելով այն, որ Մեծ Բրիտանիան Իրանում չունի պաշտոնական ներկայացուցչություն, կնոջ ազատմանն ուղղված բանակցային գործընթացը բարդանում է։–0–
Ծանոթացեք լուրերին առաջինն ու քննարկեք դրանք մեր Telegram-ում
12:26 31.05.2014