Facebook–ի միջոցով շփվելը մարդկանց ավելի երջանիկ չի դարձնում, հայտարարում են գիտնականները
ԵՐԵՎԱՆ, 15 օգոստոսի. /ԱՌԿԱ/. Facebook սոցիալական ցանցի օգտագործումն օգնում է մարդկանց տպավորություն ստեղծել, թե իրենք միշտ կապի մեջ են, բայց նրանք ավելի երջանիկ չեն դառնում, գրում է ՌԻԱ Նովոստին` ներկայացնելով PLOS ONE ամսագրում ԱՄՆ գիտնականների հրապարակած հետազոտությունը։
Միչիգանի համալսարանի հետազոտողների տվյալներով (University of Michigan), որքան ավելի շատ է մարդը ժամանակ անցկացնում սոցիալական ցանցում, այնքան ավելի ցածր է նրա բավարարվածությունը սեփական կյանքով։ Մարդիկ իրենց ավելի երջանիկ չեն զգում` հարյուրավոր վիրտուալ շփումներ ունենալով։
«Facebook–ը կարծես հնարավորություն է տալիս բավարարելու մարդու` շփման հիմնական կարիքը։ Սակայն կյանքի հանդեպ բավարարվածությունը բարձրացնելու փոխարեն հանգեցնում է հակառակ արդյունքի` նվազեցնում է այն»,– ասում է սոցիալական հոգեբան Էթըն Քրոսը (Ethan Kross) Միչիգանի համալսարանին առընթեր Սոցիալական հետազոտությունների ինստիտուտից։
Հետազոտության ընթացքում գիտնականները հարցման են ենթարկել Facebook–ից օգտվող 82 չափահասի, ովքեր ցանցից օգտվում են սմարթֆոնի միջոցով։ Օրական հինգ անգամ տարբեր ժամերի երկու շաբաթվա ընթացքում հեղինակները կամավորներին հաղորդագրություններ են ուղարկել այսպիսի հարցերով` «Ինչպե՞ս ես քեզ զգում հենց հիմա», «Անհանգի՞ստ ես հիմա», «Միայնա՞կ ես զգում հիմա», «Որքա՞ն հաճախ ես քո էջն այցելել մեր վերջին հարցումից հետո», «Որքա՞ն հաճախ ես մարդկանց հետ անմիջականորեն շփվել վերջին հարցման պահից»։
Հեղինակները խնդրել են մասնակիցներին գնահատել կյանքի հանդեպ ունեցած բավարարվածության մակարդակն ուսումնասիրության սկզբում ու վերջում և հայտնաբերել են, որ որքան ավելի հաճախ է մարդն օգտվել Facebook–ից, այնքան ավելի ցածր է եղել բարեկեցության նրա ընկալումը։ Միաժամանակ, մարդկանց հետ առերես կամ հեռախոսով շփումը բարելավել է փորձի մասնակիցների ինքնազգացողությունը։
Հեղինակները կարծում են, թե այս հետևությունների բացատրությունն է այն է, որ մարդն ավելի հաճախ օգտվում է սոցցանցից, երբ միայնակ է կամ վատ է զգում։ -0-
Ծանոթացեք լուրերին առաջինն ու քննարկեք դրանք մեր Telegram-ում
14:14 15.08.2013
