Facebook–ն առաջատարի դիրքերում է սոցիալական ցանցերի հայ օգտատերերի շրջանում. հետազոտություն
ԵՐԵՎԱՆ, 20 նոյեմբերի. /ԱՌԿԱ/. Facebook սոցիալական ցանցն առաջատարի դիրքերում է սոցիալական ցանցերի հայ օգտատերերի շրջանում, չորեքշաբթի ասաց «Ռեգիոն» հետազոտական կենտրոնի տնօրեն Լաուրա Բաղդասարյանը` ներկայացնելով «Facebook–ը Հայաստանում. օգտատերերը և կիրառումը» հետազոտությունը։
«Facebook–ը ոմանց համար կապի միջոց է, իսկ ուրիշների համար` բիզնեսի առաջադրման հնարավորություն, ինքնադրսևորման համար նախատեսված հարթակ։ Փաստացիորեն տարբեր խմբերի համար սոցիալական ցանցի կիրառման պատճառները տարբեր են, սակայն նրանց համախմբում է այն, որ Facebook–ն այսօր մեծ նշանակություն ունի նրանց համար` լինի դա նրանց մասնագիտական գործունեությունը, անձնական շփումը կամ ժամանցի հնարավորությունը»,– ասաց Բաղդասարյանը։
Ըստ նրա` հետազոտության համաձայն, մասնավորապես Facebook–ի օգտատերերի թիվը Հայաստանում բավական ակտիվ է աճում` ամսական 20–30 հազար մարդով և ըստ վերջին տվյալների` արդեն հասել է 560 հազարի։ Միաժամանակ «Օդնոկլասնիկի» սոցիալական ցանցը` 775 հազար, իսկ «Վկոնտակտեն»` 310 հազար։
Փորձագետը նշեց, որ հարցվածների հիմնական մասը հայտնեց, որ Facebook–ում օրական ավելի քան երկու ժամ է անցկացնում, իսկ որոշ մարդիկ դրա վրա են ծախսում հիմնական ժամանակը։ Դա վկայում է, որ շատ օգտատերեր արդեն սոցիալական ցանցից իրական կախվածության մեջ են։
«Անսպասելի էին լրատվության ներկայացուցիչների հարցման արդյունքները, ովքեր նշեցին, որ Facebook–ն իրենց համար ոչ թե տեղեկատվություն տարածելու միջոց է, այլ այն ստանալու, քանի որ սոցիալական ցանցը հանդես է գալիս որպես տեղեկատվության լայն հատվածի կուտակում և հնարավորություն է ընձեռում ծանոթանալ տարբեր մարդկանց կարծիքին»,– ասաց Բաղդասարյանը։
Ըստ նրա` Facebook–ում` ի տարբերություն սովորական լրատվության, առավել ամբողջական և մանրամասն են ներկայացված այն գործընթացները, որոնք կարևոր նշանակություն ունեն հասարակության համար։
Միաժամանակկ նա նշեց, որ ըստ օգտատերերի մի մասի` հետազոտության համաձայն, այսօրվա դրությամբ Facebook–ը կարծիքների այն բազմազանությունը չունի, որը հատուկ է հայ հասարակությանը։
Որպես հետաքրքիր փաստ` նա նշեց հայտնի ապրանքանիշերի կողմից սոցիալական ցանցի օգտագործումը, որոնք լրացուցիչ PR–ի կարիք չունեն, սակայն փորձում են օգտագործել նաև այս հարթակը օգտատերերի հետ շփվելու նպատակով։
Հետազոտությունն անցկացվել էր 2013թ.–ի սեպտեմբեր–հոկտեմբեր ամիսներին Facebook–ի 150 օգտատերերի շրջանում, ովքեր ներկայացնում են քաղաքացիների հինգ հիմնական կատեգորիաները` հասարակական քաղաքական գործիչներ, բիզնեսի ներկայացուցիչներ, լրագրողներ, արվեստի գործիչներ, հասարակ քաղաքացիներ։
Հետազոտությունն անցկացվել էր «Ռեգիոն» հետազոտական կենտրոնի կողմից` ԵԱՀԿ երևանյան գրասենյակի աջակցությամբ` Հայաստանում միջազգային չափանիշներին համապատասխան ընտրական գործընթացի կատարելագործման ծրագրի շրջանակներում։ –0–
Ծանոթացեք լուրերին առաջինն ու քննարկեք դրանք մեր Telegram-ում
15:06 20.11.2013