Facebook Messenger–ն անվճար կլինի 14 երկրում, Հայաստանն առայժմ դրանց թվում չէ
ԵՐԵՎԱՆ, 4 մարտի. /ԱՌԿԱ/. Բջջային կապի գրեթե երկու տասնյակ օպերատորներ 14 երկրներում իրենց բաժանորդներին բջջային սարքերից Facebook Messenger հաղորդագրությունների փոխանակման ծառայությանն անվճար կամ էական զեղչերով օգտվելու հնարավորություն կընձեռի, սակայն Հայաստանն առայժմ այդ երկրների ցուցակում չէ։
Ինչպես հաղորդում է ՌԻԱ Նովստին, Facebook սոցցանցը հայտարարել է այդ երկրների օպերատորների հետ համապատասխան համաձայնագրերի ստորագրման մասին նախորդ շաբաթ
Համաձայնագրի շրջանակներում օգտագործողները կարող են անվճար կամ տրաֆիկի զեղչերով հաղորդագրություններ փոխանակել Android և iOS պլատֆորմների համար գործող Facebook Messenger ներդիրի, ինչպես նաև Facebook ներդիրի միջոցով «չատերի» համար օպտիմալացված բյուջետային բջջային հեռախոսների համար։ Հատուկ առաջարկությունը հասանելի կլինի նաև Ռուսաստանում։
Առաջարկը վավեր կլինի աշխարհի 18 օպերատորների համար 14 երկրներում` ներառյալ Three–ն Իռլանդիայում, Smart–ը` Ֆիլիպիններում, Oi–ին` Բրազիլիայում, Airtel և Reliance–ը` Հնդկաստանում, Tre–ն Իտալիայում, Ինդոնեզիայի և այլ երկրների չորս ազգային օպերատորներ։ Facebook–ը չի հստակեցնում գործընկերների ծրագրի ընդլայնման մտադրություններն այլ երկրներում և այլ օպերատորների հետ։
«ԱՌԿԱ» գործակալությունը փորձեց պարզել, թե արդյո՞ք, մտադիր են բջջային կապի հայկական օպերատորները նման համաձայանգրեր կնքեն Facebook–ի հետ, և, արդյո՞ք, համապատասխան բանակցություններ են տարվում։
Այսպես, «ԱրմենՏել» ՓԲԸ–ի (Beeline ապրանքանիշ) հասարակայնության հետ կապերի ծառայության ղեկավար Անուշ Բեղլոյանի խոսքով, հարցը «ՎիմպելԿոմ»–ի կենտրոնակայանի իրավասության դաշտում է։
«Եթե լուրեր լինեն, ապա մենք անպայման կհայտնենք»,– ասաց նա։
Orange Armenia ընկերության մամուլի քարտուղար Լիլիթ Մարտիրոսյանն իր հերթին տեղեկացրեց, որ Orange–ի հետվճարային բաժանորդների համար արդեն վաղուց գործում է «Պանտերա» հատուկ սակագնային փաթեթը, որը բջջային սարքերից Facebook, Twitter, Vkontakte, Odnoklassniki, Orangeblog.am սոցցանցեր մտնելու անվճար հնարավորություն է ընձեռում։
«Կանխավճարային բաժանորդների համար ունենք առաջարկներ ցածր գներով` Orange 1 սակագնային փաթեթի շրջանակներում»,– ավելացրեց նա։
«ԱՌԿԱ» գործակալությանն առայժմ չի հաջողվել մեկնաբանություն ստանալ VivaCell – MTS օպերատորից։
Socialbakers.com ռեսուրսի տվյալների համաձայն, այս տարվա մարտի տվյալներով Facebook սոցցանցում գրանցված է 395 340 օգտագործող Հայաստանից, ինչը կազմում է երկրի բնակչության 13.32 տոկոսը։
Facebook աշխարհի խոշորագույն սոցցանցի օգտագործողների թիվը գերազանցում է մեկ միլիարդը, ավելի քան 600 միլիոնն օգտվում են ընկերության բջջային ծառայություններից։ Ընկերության տվյալներով, հաղորդագրությունների փոխանակման ֆունկցիան ներկայում հասանելի է ավելի քան 6 հազար մոդելի բջջային հեռախոսներում` ինչպես հատուկ մշակած ներդիրների, այնպես էլ սոցցանցի բջջային տարբերակի միջոցով։ -0-
Ծանոթացեք լուրերին առաջինն ու քննարկեք դրանք մեր Telegram-ում
18:45 04.03.2013
