Facebook–ը կեղծ լուրերի դեմ պայքարի ֆունկցիա կգործարկի
ԵՐԵՎԱՆ, 16 դեկտեմբերի. /ԱՌԿԱ/. Facebook սոցցանցը կսկսի թեստավորել նոր ֆունկցիա, որը թույլ է տալիս տեղեկացնել կեղծ լուրերի մասին և հատուկ նշել դրանք։
Ինչպես հայտնում է Lenta.ru–ն` հղում անելով The Financial Times–ին, եթե օգտատերը կասկածելի համարի նյութը, նա կարող է յուրաքանչյուր հրապարակման վերին աջ անկյունում համապատասխան կոճակ սեղմել։ Այդպիսի լուրերը կուղարկվեն հատուկ կազմակերպություններին, որոնք զբաղվում են փաստերի ստուգմամբ։
Եթե փորձագետները բացահայտեն նյութի` կեղծ լինելը, ապա այն կնշվի «վիճելի» գրառմամբ` ստուգումն իրականացրած կազմակերպության հիմնավորման հղումով։
Facebook–ում այսպիսի ֆունկցիա ստեղծելու անհրաժեշտությունը հասունացել է նրանից հետո, երբ Համացանցում ԱՄՆ նախագահական ընտրությունների քարոզարշավի ընթացքում սրվել է վարկաբեկող լուրերի պատերազմը, որը, ինչպես շատերն են կարծում, կարող էր ազդել քաղաքացիների ընտրության վրա։ Այդ միտման առավել վառ դրսևորումը, այսպես կոչված, Pizzagate–ն է։
Նոյեմբերի վերջին Reddit պորտալի այցելուները WikiLeaks կայքում հրապարակված նամակներում PizzaGate «գաղտնի կոդ» են հայտնաբերել, որը, իբր, ստեղծվել է ԱՄՆ քաղաքական վերնախավի կողմից երեխաների հետ սեռական կապերի մասին հաղորդումների փոխանցման համար։
Օգտատերերը միանգամից մեղադրել են Comet Ping Pong պիցցերիայի սեփականատեր Ջեյմս Ալեֆանտիսին մանկապղծության լոբբիին սատարելու համար։
Նշվում էր, որ այդ ցանցին առնչություն ունի դեմոկրատ թեկնածու Հիլարի Քլինթոնի շրջապատը։
Սոցցանցերը լցվել են կեղծ լուրի վերահրապարակումներով և քննարկումներով, դրան մասնակցում էին հանրապետական թեկնածու Դոնալդ Թրամփի համախոհները։ Դեկտեմբերի 4–ին պիցցերիա է ներխուժել զինված անձ` այդ հարցն ինքնուրույն լուծելու մտադրությամբ, և ձերբակալվել է։ -0-
Ծանոթացեք լուրերին առաջինն ու քննարկեք դրանք մեր Telegram-ում
12:50 16.12.2016