Facebook–ը թույլ է տալիս, որ օգտատերերը «կտակեն» իրենց հաշիվները
ԵՐԵՎԱՆ, 13 փետրվարի. /ԱՌԿԱ/. Facebook սոցիալական ցանցը «կտակ թողնելու» հնարավորություն է տալիս, որով ամրագրում է օգտատիրոջ մահից հետո հաշիվը ժառանգելու պայմանները։ Այդ մասին, ինչպես գրում է Лента.ру–ն, նշված է ընկերության կայքում։
«Երբ մարդը հեռանում է կյանքից, ապա նրա էջը դառնում է անձնական կյանքի, ընկերների և տպավորությունների մասին պատմող մի հուշ»,– ասվում է հաղորդագրության մեջ։
Կտակը թույլ է տալիս հաշիվը փոխանցել ընտանիքի անդամներից որևէ մեկին կամ ընկերոջը։ Եթե Ինչ–որ մեկը հայտնում է, որ հաշվի տերը մահացել է, ապա հանգուցյալի էջը «հիշատակի» կարգավիճակ է ստանում։ Ժառանգորդը կարող է հաղորդումներ կատարել նրա պատին (օրինակ` հայտնել հուղարկավորության ամսաթվի մասին), ինչպես նաև պատասխանել այն մարդկանց «ընկերության առաջարկի» հայտերին, ովքեր չեն «ընկերացել» հանգուցյալի հետ նրա կենդանության օրոք։
Բացի այդ, նա կարող է փոխել գլխավոր նկարն ու ֆոնը, «հավանել» այն նկարներն ու գրառումները, որոնցում նշված է էջի հանգուցյալ տերը։ Միաժամանակ կտակում նշված անձը չի կարող էջ մտնել հանգուցյալի գաղտնաբառով և իմանալ այն տեղեկությունը, որը թաքցրած է ուրիշներից։
Հաշվի տերը կարող է ընտրել «իր մահից հետո տվյալների ամբողջական հեռացում» տարբերակը։
Այս գործառույթի հասանելիությունը ստանալու համար պետք է բացել կարգավորումները և ընտրել Security, այնուհետև` Legacy Contact, և գրել օգտագործողի մահից հետո էջի կառավարման պայմանների մանրամասները։
Ռուսալեզու էջում դա հավասար է «Настройки — Конфиденциальность» գործառույթներին։ Սակայն «Лента.ру»–ի թղթակցի էջում այդ գործառույթը դեռ չի հայտնվել, այդ պատճառով դեռ հասկանալի չէ, թե ինչպես է այն կոչվելու։
Նախկինում մահացածների հաշիվները տեսանելի էին սոցցանցում, սակայն ոչ ոք չէր կարողանում դրանք կառավարել։
-0-
Ծանոթացեք լուրերին առաջինն ու քննարկեք դրանք մեր Telegram-ում
19:43 13.02.2015