Հայ ցանցահեններն ադրբեջանական պետական կայքերի գաղտնի տվյալներ են հրապարակել համացանցում
ԵՐԵՎԱՆ, 25 նոյեմբերի. /ԱՌԿԱ/. Monte Melkonyan Cyber Army հայկական հաքերային խումբը համացանցում հրապարակել է ադրբեջանական պետական կայքերի գաղտնի տվյալների մի մասը, հաղորդում է Monte Melkonyan Cyber Army–ն։
«Նոյեմբերի 23-ի գիշերը Monte Melkonyan Cyber Army հաքերական խումբը կոտրել է մի շարք ադրբեջանական կայքեր, համացանցում հրապարակել է գաղտնի տվյալների մի մասը և կայքերում տեղադրել է խոցված ուղղաթիռի և զոհված օդաչուների լուսանկարները», – նշվում է հաքերական խմբի տեղեկատվության մեջ։
ԼՂՀ ՊՆ–ն նոյեմբերի 12–ին տեղեկացրել էր, որ ադրբեջանցի զինվորականները շփման գծում խոցել են Ղարաբաղի ՄԻ–24 ուղղաթիռը, որը ուսումնամարզական թռիչք էր իրականացնում, և ուղղաթիռի կախոցի վրա ոչ մի սպառազինություն չկար։ Շաբաթ օրը ԼՂՀ ՊՆ ԶՈւ–ի զինծառայողները հատուկ օպերացիայի ընթացքում տարհանել են ուղղաթիռի անձնակազմի անդամների մարմինները։
Խումբը կայքերը կոտրելու փաստը նվիրել է հայ ժողովրդի հերոս Մոնթե Մելքոնյանի (Ավո) ծննդյան օրվան։
Ցանցահեններն իրենց հայտարարության մեջ ներկայացնում են նաև կոտրված կայքերի ցանկն ու այն հղումները, որոնց միջոցով կարելի է ներբեռնել կոտրված ադրբեջանական կայքերի գաղտնի տվյալները, որոնց թվում է նաև Ադրբեջանի արդարադատության նախարարության կայքը։
Նոյեմբերի 25-ին լրանում է Ղարաբաղյան պատերազմի հերոս և ՀԱՀԳԲ-ի նախկին անդամ, ՀՀ ազգային հերոս, ուրարտագետ, Հայ Դատի և արցախյան ազատամարտի նվիրյալ Մոնթե Մելքոնյանի (Ավո) 57 ամյակը։ Մոնթե Մելքոնյանը ծնվել է 1957 թվականի նոյեմբերի 25-ին ԱՄՆ-ում: Մահանալուց ոչ շատ առաջ ասված նրա խոսքերը չափազանց կարևոր են յուրաքանչյուր հայի համար` անկախ այն հանգամանքից, թե աշխարհի որ անկյունում է նա ապրում։ «Եթե կորցնենք Արցախը, մենք կփակենք հայ ժողովրդի պատմության վերջին էջը»։-0-
Ծանոթացեք լուրերին առաջինն ու քննարկեք դրանք մեր Telegram-ում
19:46 25.11.2014