Հայոց ցեղասպանության մասին պատմող գերմանալեզու կայքը գործարկվել է
ԵՐԵՎԱՆ, 2 փետրվարի. /ԱՌԿԱ/. Գործարկվել է Հայոց ցեղասպանության մասին պատմող գերմանալեզու կայքը (www.genozid1915.de)։
Նոր ինտերնետ–կայքը հրապարակում է Ցեղասպանության մասին պատմող ամենատարբեր տեղեկություններ` լուսանկարներ, տեսանյութեր, արխիվային փաստաթղթեր, ինչպես նաև տեղեկատվություն ԳԴՀ–ի հայկական համայնքի գործունեության մասին, որն ուղղված է Գերմանիայի կողմից Հայոց ցեղասպանության ճանաչմանը։
Կայքում հրապարակված են նորություններ, որոնք նվիրված Հայոց ցեղասպանության խնդրին, մասնավորապես` Փերինչեքի գործով դատավարությանը։
Կայքի հիմնական թիրախային լսարանը Եվրոպայի գերմանալեզու բնակչությունն է։ Կայքը կոչված է լրացնել գերմաներենով Ցեղասպանության մասին տեղեկատվության բացը։ Օգտատերերը կարող են հարցեր ուղղել մշակողներին, կայքում գործում է feedback ծառայությունը։
Կայքը ստեղծվել է Գերմանիայում Հայոց ցեղասպանության 100–րդ տարելիցին նվիրված միջոցառումների նախապատրաստմամբ զբաղվող կոմիտեի կողմից։
2007թ.–ին Լոզանի դատարանը Թուրքիայի աշխատավորական կուսակցության առաջնորդ Դոգու Փերինչեքին մեղավոր ճանաչեց ռասայական խտրականության մեջ Հայոց ցեղասպանության հրապարակային ժխտման կապակցությամբ` պարտավորեցնելով նրան վճարել մի քանի տուգանք։ Սակայն ավելի ուշ Մարդու իրավունքների եվրոպական դատարանը համարեց դա Փերինչեքի իրավունքների խախտում։ Շվեյցարիան բողոքարկել է այդ որոշումը ՄԻԵԴ–ի Գերագույն պալատում:
Հայոց ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ -0-
Ծանոթացեք լուրերին առաջինն ու քննարկեք դրանք մեր Telegram-ում
12:50 02.02.2015