Շուկայի մասնակիցները հավանություն են տվել ԱՄՆ–ի` համացանցի վերահսկողությունից հրաժարվելու ծրագրերին
ԵՐԵՎԱՆ, 17 մարտի. /ԱՌԿԱ/. Դոմենային շուկայի դերակատարներն ու խոշոր ինտերնետ–ասոցիացիաների ներկայացուցիչները հավանություն են տվել ԱՄՆ–ի կառավարության` դոմենային անուններ տրամադրելու գործառույթից հրաժարվելու որոշմանը, ինչը փաստացի նշանակում է, որ ԱՄՆ–ն հրաժարվում է մենաշնորհային վերահսկողությունից, հայտնում է Digit.ru–ն` հղում անելով ICANN կորպորացիայի կայքի տվյալներին։
ԱՄՆ առևտրի նախարարությունը, որը վերահսկում է վերին մակարդակի դոմենների (gTLD) և ցանցային հասցեների տվյալների բազան, հայտնել է, որ մտադիր է վեբ–հասցեների վերահսկողությունը փոխանցել ոչ կառավարական միջազգային կազմակերպությանը, որը դեռ պետք է ստեղծվի։ 1998 թվականից վերին մակարդակի դոմենների համակարգը կառավարում էր ICANN–ը պետական պայմանագրով, որի գործողությունը լրանում է 2015 թվականին։ ԱՄՆ իշխանություններն արդեն դիմել են ICANN տարբեր երկրներում շահագրգիռ խմբերի հետ լիազորությունները փոխանցելու քննարկման խնդրանքով։ Խորհրդատվությունները կսկսվեն մարտի 24–ին Սինգապուրում, գրում է Փրայմը։
Ինտերնետ հանրությունը դրական է արձագանքել այդ լուրին։ Նախաձեռնությանն օժանդակելու որոշմամբ են հանդես եկել ցանցի տեխնիկական կառուցվածքի համար պատասխանատու կազմակերպություններ` Ինտերնետի ճարտարագիտական խորհուրդը (IETF), Ինտերնետի ճարտարապետության խորհուրդը (IAB), դոմենների տարածաշրջանային և ազգային գրանցող կազմակերպությունները, Ինտերնետ միությունը (ISOC) և Համաշխարհային ցանցի կոնսորցիումը (W3C)։ Նմանատիպ հայտարարություններ են տարածել դոմեններ մի քանի խոշոր գրանցող կազմակերպություններ, ներառյալ` Donuts–ը, Neustar–ը և Afilias–ը։
«Անցումը հնարավոր է տեխնիկական ինտերնետ կազմակերպությունների հասունության շնորհիվ, որոնք կատարում են իրենց գործառույթները հասցեական ինտերնետ տարածության ադմինիստրացիայի (IANA) նկատմամբ։ Մեր կազմակերպությունները հավատարիմ են բաց և թափանցիկ գործընթացներին ավելի մեծ թվով շահագրգիռ անձանց ներգրավմամբ։ Ինտերնետի տեխնիկական հանրությունը բավականին ուժեղ է, որ ապահովի ինտերնետի կառավարման պատասխանատվության անցումն ԱՄՆ–ից նոր կազմակերպության»,– նշվում է համատեղ հաղորդագրությունում։
Ինչպես հայտնում էր Digit.ru–ն, ICANN–ի նախագահ Ֆադի Շեխադեն ավելի վաղ կոչ էր արել դոմենային ինդուստրիայի ներկայացուցիչներին մտածել ICANN–ն ԱՄՆ–ի ենթակայությունից հանելու մասին Էդվարդ Սնոուդենի հետ կապված սկանդալից հետո։ -0-
Ծանոթացեք լուրերին առաջինն ու քննարկեք դրանք մեր Telegram-ում
19:43 17.03.2014