#ГеноцидАрмян հեշթեգը Թվիթերի ռուսական հատվածի թրենդի առաջատարն է
ԵՐԵՎԱՆ, 24 ապրիլի. /ԱՌԿԱ/. #ГеноцидАрмян հեշթեգը Թվիթերի ռուսական հատվածի թրենդի առաջատարն է, գրել է տեղեկատվական անվտանգության փորձագետ Սամվել Մարտիրոսյանը Facebook սոցցանցի իր էջում։
Նրա տվյալներով` Ֆրանսիայում թոփ հեշթեգերի թվում կան երկու հայկական հեշթեգեր` #Armenie և #genocide1915։
Մարտիրոսյանը ուսումնասիրել է նաև Թվիթերի թուրքական հատվածը, որտեղ ամենաթրենդային հեշթեգերի թվում են #Gallipoli100 (Գալիպոլիի ճակատամարտի 100-ամյակ) և #ErmeniSoykirimi (Հայոց ցեղասպանության թեմայով)։
Երևանի Ծիծեռնակաբերդի հուշահամալիրում ուրբաթ տեղի ունեցավ Օսմանյան կայսրությունում Հայոց ցեղասպանության 100-րդ տարելիցին նվիրված հիշատակի արարողություն։ Դրան մասնակցում էին բարձրաստիճան պատվիրակություններ աշխարհի ավելի քան 40 երկրներից։ Արարողության հյուրերի թվում են Ռուսաստանի նախագահ Վլադիմիր Պուտինը, Ֆրանսիայի նախագահ Ֆրանսուա Օլանդը, Սերբիայի նախագահ Տոմիսլավ Նիկոլիչը և Կիպրոսի նախագահ Նիկաս Անաստասիադիսը։
Հեշթեգը (նշան) բառ է կամ բառակապակցություն, որին նախորդում է # նշանը, որի օգնությամբ սոցցանցի օգտատերերը կարող են խմբի մեջ միավորել նույն թեմայի կամ տիպի հաղորդագրությունները։
Հայոց ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին շուրջ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Արևմուտքի այն քննադատություններին, որոնք վերաբերում են Հայոց ցեղասպանության հարցին։
Հայոց ցեղասպանության փաստը ճանաչել են բազմաթիվ երկրներ, մասնավորապես` Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Հոլանդիան, ԱՄՆ նահանգների մեծամասնությունը, ինչպես նաև Ավստրիայի, Չիլիի, Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Շվեյցարիայի Ազգային խորհուրդը, Կանադայի խորհրդարանի համայնքների պալատը և Լեհաստանի սեյմը։ –0–
Ծանոթացեք լուրերին առաջինն ու քննարկեք դրանք մեր Telegram-ում
15:55 24.04.2015
