Հայաստանի տեղեկատվական անվտանգություն vs ցանցահեններ. մարտահրավերներ և սպառնալիքներ ապրիլի 24–ի նախաշեմին
ԵՐԵՎԱՆ, 13 ապրիլի. /ԱՌԿԱ/. Տեղեկատվական տեխնոլոգիաների ոլորտի մասնագետները, որոնք հանգստյան օրերին Ծաղկաձորում մասնակցել են «Մեդիա և տեղեկատվական անվտանգություն» համաժողովին, քննարկել են ցանցում անվտանգության տարրական կանոններին վերաբերող հարցերի լայն շրջանակ։ Հատուկ ուշադրություն է դարձվել վերջին ժամանակներում սոցցանցերում վիրուսային հղումների տարածմանն ու հայկական կայքերի դեմ ցանցահենների գրոհներին, հատկապես ապրիլի 24–ին` Հայոց ցեղասպանության զոհերի հիշատակի օրը։
Կայքերը վտանգի տակ
Այսօրվա դրությամբ ցանցահենների գրոհները «համաշխարհային սարդոստայնի» գլխավոր խնդիրներից մեկն է` հրապարակվում են խոշոր ընկերությունների գաղտնի տվյալներ, քաղաքական և հայտնի գործիչների կոտրած էջերից անհեթեթություններ են տարածում, վիրուսներ են տարածել, բազմաթիվ ընկերություններ ստիպված են լինում միլիոններ ծախսել իրենց կայքերի, տվյալների բազայի և կարևոր այլ տեղեկության վերականգնման համար։
Համաժողովում ՏՏ մասնագետները քննարկել են Հայոց ցեղասպանության 100–րդ տարելիցին հայկական առավել խոցելի ԶԼՄ–ների և խոշոր կայքերի անվտանգությանը վերաբերող հարցեր։
Ցանցահենային «Ցեղասպանություն»
Խոսելով Հայաստանում Ցեղասպանության հարյուրերորդ տարելիցի առիթով ցանցահենների գրոհների թեմայի մասին` տեղեկատվական անվտանգության փորձագետ Սամվել Մարտիրոսյանը նշեց, որ վերջին ժամանակներում գրոհների թիվը մի փոքր կրճատվել է, գուցե հարևան երկրների ցանցահենները պատրաստվում են ապրիլի 24–ին խոշոր գրոհի։
«Մեծ վտանգի տակ են մեր հիմնական լրատվական կայքերը, և, բնականաբար, ապրիլի 24–ին ցանցահենները կփորձեն DDOS-գրոհների օգնությամբ անել այնպես, որ «խլացնեն տեղեկատվական այն աղբյուրները, որոնք ակտիվ լուսաբանելու են Ցեղասպանության 100–րդ տարելիցի միջոցառումները»»,– ասաց Մարտիրոսյանը։
Փորձագետը նշեց, որ կայքերը կարող են «կախվել» ոչ միայն ցանցահենների գրոհների պատճառով, այլ նաև բեռնվածության հետևանքով։ «Կայքերը «կախվում են» և չեն դիմանում բեռնվածությանը, քանի որ տարբեր երկրներից դրանց այցելությունների թիվը կտրուկ աճում է։ Օրինակ` այս շաբաթ բազմաթիվ հայկական կայքեր, որոնք գրում էին Քիմ Քարդաշյանի այցի մասին, այդ խնդրին բախվել են»,– ավելացրեց Մարտիրոսյանը։
Վտանգ համացանցից
Հայաստանի ոստիկանության գնդապետ Վահագն Հարությունյանն անդրադարձավ անչափահասների առցանց անվտանգության խնդրին։ Նրանք հաճախ շփման մեջ են մտնում անծանոթների հետ, որոնք արդյունքում կարող են չարագործներ, մանկապիղծներ լինել և այլն։
Ըստ նրա` Հայաստանի ոստիկանությունը և կրթության և գիտության նախարարությունն արդեն երկրորդ տարին է, ինչ դպրոցներում պարապմունքներ են անցկացնում ոստիկանների գործունեության վերաբերյալ դպրոցականների իրազեկության մակարդակը բարձրացնելու նպատակով։
Հարությունյանի խոսքով` նմանատիպ դասերն օգնում են երեխաներին և նրանց ծնողներին անհրաժեշտության դեպքում ժամանակին դիմել ոստիկանություն։
Տեղեկատվական պատերազմ
Հաշվի առնելով Հայաստանում ցանցահենների գրոհների վտանգը, հատկապես պաշտպանության և անվտանգության ոլորտում` Զինված ուժերն ու Պաշտպանության նախարարությունն անում են հնարավորինը, որ պաշտպանեն իրենց պաշտոնական կայքերը կոտրելուց։
Մասնավորապես` ԶՈՒ Գլխավոր շտաբի մասնագետներից մեկն ասել է, որ պաշտպանական գերատեսչությունը զբաղվում է գլոբալ տեղեկատվական ծրագրմամբ` քայլ առ քայլ կատարելով իր առջև դրված խնդիրները։
«Մեդիա և տեղեկատվական անվտանգություն» համաժողովն անցկացվում է «Ճանաչեք 1915 թվականը» (www.recognize1915.am) ծրագրի շրջանակում։ Նախագծի հիմնական նպատակն աշխարհին Հայոց ցեղասպանության մասին տեղեկատվություն հասցնելն է։ -0-
Ծանոթացեք լուրերին առաջինն ու քննարկեք դրանք մեր Telegram-ում
18:31 13.04.2015