Համաշխարհային սարդոստայնը կարող է այլընտրանքային դոմենային գոտիների բաժանվել. հայ փորձագետ

ԵՐԵՎԱՆ, 14 հուլիսի. /ԱՌԿԱ/. Համաշխարհային սարդոստայնը կարող է այլընտրանքային դոմենային գոտիների բաժանվել, կարծում է «Ինտերնետ հանրություն» ՀԿ–ի նախագահի տեղակալ Գրիգորի Սաղյանը։

Ըստ նրա, այս տարվա մարտին ԱՄՆ–ի առևտրի նախարարությունը, որը կառավարում է ինտերնետի կարևոր օղակը` դոմենային անունները, որոշում է ընդունել իր ֆունկցիաները փոխանցել մեկ այլ կազմակերպության, որը չպետք է պետական լինի կամ կառավարվի միջազգային կառույցների կողմից, բազմապրոֆիլային լինի և հասարակական կազմակերպությունների, տեխնիկական հանրության, ակադեմիաների, բիզնեսի և կառավարության միաձուլում լինի։

Սաղյանը նշեց, որ եթե մինչև 2015 թվականի սեպտեմբերի 30–ն այդպիսի կազմակերպություն չձևավորվի, ապա ԱՄՆ կառավարությունը կշարունակի ինտերնետ կառավարման իր պարտավորությունները ևս 4 տարով։

Միաժամանակ, ինտերնետի այն մասի կառավարմանը, որը ներկայում ԱՄՆ–ի ենթակայության ներքո է, հավակնում են ICANN միջազգային ոչ առևտրային կազմակերպությունը և Էլեկտրակապի միջազգային միությունը։

«Նման անհրաժեշտություն է առաջացել Էդվարդ Սնոուդենի աղմկալի բացահայտումներից հետո, երբ աշխարհի բազմաթիվ երկրներ մեղադրել են ԱՄՆ–ին ինտերնետ–ռեսուրսների վերահսկողության մեջ, և այս կապակցությամբ ստեղծվել է անցումային հանձնաժողով, որը կքննարկի բոլոր հնարավորությունները, այդ թվում` լիազորություններն այլ կառույցի հանձնելու վերաբերյալ»,– ասաց Սաղյանը։

Նա միաժամանակ նշեց, որ այսպիսի որոշումը հղի է որոշակի սպառնալիքներով, որոնց թվում է ինտերնետի բաժանումը։

Փորձագետի կարծիքով` այսօր գոյություն ունեն տարբեր դոմենային գոտիներ տարբեր երկրներում, որոնք վերահսկում է ICANN–ը, իսկ խոշոր երկրները, այդ թվում` Ռուսաստանն ու Չինաստանը, ծրագրում էին ստեղծել այլընտրանքային դոմենային կառուցվածք, ինչը նշանակում է ընդհանուր ինտերնետի բացակայություն և դրա անջատումն ավելի մանր բաղադրիչների։

«Յուրաքանչյուր երկիր կարող է ստեղծել սեփական այլընտրանքային դոմենային գոտին, որն ամբողջությամբ անջատված կլինի Համաշխարհային սարդոստայնից, և դա կհանգեցնի նրան, որ նման երկրներ նույնիսկ անհնար կլինի էլեկտրոնային նամակներ ուղարկել»,– ասաց Սաղյանը։

Ինչպես կարծում է հայ փորձագետը, այս միտումը բավականին վտանգավոր է։ Միաժամանակ, նա հույս հայտնեց, որ դրանով իսկ ԱՄՆ–ն, հնարավոր է, միայն ստուգում է նաև միջազգային հանրության արձագանքը։

Միջազգային գնահատականներով, այսօր ինտերնետ հասանելիություն ունի մոլորակի բնակչության 40 տոկոսը։ Խոսքը միլիարդավոր մարդկանց մասին է, ընդ որում` եթե ներկայում օգտագործողների կեսը բնակվում է Ասիայում, ապա մինչև 2020 թվականը, երբ համացանցը կընդգրկի մարդկության 65 տոկոսը, ասիացի օգտագործողների բաժնեմասն ավելի կաճի։

Էլեկտրակապի միջազգային միության տվյալներով` ինտերնետ օգտագործողների թափանցման մակարդակը կազմում է 78 տոկոս զարգացած երկրներում և 32 տոկոս` զարգացողներում։ Բնակչության ավելի քան 90 տոկոսը, որը դեռ չի օգտվում ինտերնետից, ապրում է զարգացող երկրներում։ ԷՄԿ–ի կանխատեսմամբ, մինչև 2014 թվականի վերջ ինտերնետից օգտվելու է 3 միլիարդ մարդ կամ մոլորակի բնակչության 42.3 տոկոսը (Երկրի ամբողջ բնակչությունը 2014թ. հունվարի մեկի դրությամբ կազմում է 7,138 միլիարդ)։

2007-2011 թվականներին էլեկտրակապից ստացված ընդհանուր եկամուտներն աճել են 12 տոկոսով` հասնելով 1.8 տրլն դոլարի կամ համաշխարհային ՀՆԱ–ի 2.6 տոկոսի։ -0-

Ծանոթացեք լուրերին առաջինն ու քննարկեք դրանք մեր Telegram-ում

19:30 14.07.2014