Opera–ն հատուկ iPad–ի համար նոր Coast բրաուզեր է գործարկել
ԵՐԵՎԱՆ, 9 սեպտեմբերի. /ԱՌԿԱ/. Opera ընկերությունը ներկայացրել է նոր Coast բրաուզեր, որը ստեղծվել է հատուկ iPad պլանշետի համար, գրում է digit.ru–ն` հղում անելով ընկերությանը։
Coast բրաուզերում կրճատվել է կոճակների թիվը։ Բրաուզերի` կարգավորվող ֆոնային նկարով հիմնական էջում տեղադրված է արագ հասանելիության գործառույթը` հավելվածներով, որոնք կարելի է թերթել աջ ու ձախ։ Մեկնարկային էջի ներքևում են վերջին այցելած էջերը։
Մեկնարկային էջի վերին մասում է որոնողական հարցման կամ հասցեի մուտքագրման տողը։ Եթե տողը քաշենք ներքև, ապա կհայտնվի հարցման կամ մուտքագրման ընդլայնված էջ, աջից կերևան որոնման բանալի–բառերը կամ առաջարկվող կայքերը, որոնք կարելի է բացել մեկ հպումով։ Սեղմելով որոնողականի պատուհանիկին (օրինակ, Google)` կարելի է անցնել անմիջապես դրա էջը։
«Առաջ» և «Հետ» կոճակների փոխարեն օգտագործողը տեղափոխում է էջն աջ ու ձախ։ Ներքևում մեկնարկային էջ անցնելու և վերջին դիտված ներդիրները բացելու կոճակներն են, և դրանք փակվում են դեպի վեր շարժումով։ Բրաուզերը նաև ունի կայքի անվտանգության ստուգման համակարգ, որն օգտագործողին իրազեկում է վտանգավոր էջերի մասին։
Ավելի վաղ Opera–ն բջջային սարքերի համար առաջարկում էր Opera Mini բրաուզերը։
Ինչպես Digit.ru–ին են հայտնել ընկերությունից, Coast–ն App Store–ի վաճառքում կհայտնվի մինչև երկուշաբթի օրվա ավարտը։ -0-
Ծանոթացեք լուրերին առաջինն ու քննարկեք դրանք մեր Telegram-ում
19:14 09.09.2013