Ադրբեջանական քարոզչությունը թուլացել է. փորձագետ
ԵՐԵՎԱՆ, 3 նոյեմբերի. /ԱՌԿԱ/. Բաքուն շարունակում է տեղեկատվական պատերազմը, այդուհանդերձ ադրբեջանական քարոզչությունը թուլացել է, կարծում է տեղեկատվական անվտանգության փորձագետ Սամվել Մարտիրոսյանը։
«Գլոբալ նորությունն այն է, որ Ադրբեջանի քարոզչական դաշտում փոխվել է ղեկավարությունը` հակահայկական տեղեկատվական քաղաքականության մշակմամբ զբաղվող Էլնուր Ասլանովն ազատվել է աշխատանքից»,– երկուշաբթի մամուլի ասուլիսում ասաց Մարտիրոսյանը։
Փորձագետի խոսքով` Ասլանովը մեղադրվել է այն բանում, որ նուրսիստ կամ գյուլենիստ է (գյուլենիստներն իսլամ քարոզիչ Ֆեթուլահ Գյուլենի կողմնակիցների կրոնական շարժումն է` ուղղված Թուրքիայի նախագահ Ռեջեփ Թայիպ Էրդողանի քաղաքականության դեմ)։ «Ադրբեջանի նախագահ Իլհամ Ալիևը վախեցել է, որ գյուլենիստները կարող են ամրապնդել իրենց դիրքերը երկրում, և սկսել է պայքարն այն քաղաքական վերնախավի դեմ, որը կապեր ունի Գյուլենի հետ։ Այդ կապակցությամբ էլ Ասլանովն ազատվել է»,– ասաց Մարտիրոսյանը։
Փաստորեն, փորձագետի կարծիքով, Ադրբեջանում այդ իմաստով սկսվել է ձևափոխություն, քարոզչական դաշտը թուլացել է, իսկ ինքը` քարոզչությունը, վերադարձել է այն հին, ձևական և ստանդարտ ձևերին, որոնք գոյություն ունեին ավելի վաղ։ «Առայժմ հայտնի չէ, թե ինչ կլինի հետո, բայց եթե նայենք Ադրբեջանում հրապարակվող հոդվածները, ապա ակնհայտ երևում է, որ դրանց մակարդակը կտրուկ ընկել է»,– ասաց նա։
Մարտիրոսյանը կարծում է, որ Ադրբեջանում հայկական դավադրության թեման զարգանում է, վերածվում պարանոյայի և բացարձակ անհեթեթության։ «Վերջին ժամանակներս ադրբեջանցիները սկսել են զառանցանքի մեջ ընկնել այն աստիճան, որ ցանկացած հարցում կարող են մեղադրել հայերին»,– ասաց Մարտիրոսյանը։
Ըստ փորձագետի` այժմ ադրբեջանական քարոզչությունն ամբողջովին կենտրոնացած է Քարվաճառի դիվերսանտների թեմայի վրա։
«Ներկայում ադրբեջանական կողմն ինտերնետի միջոցով փորձում է գրավել այլ երկրների ուշադրությունը` համազգային քարոզարշավ սկսելով, որի էությունն այն է, որ Twitter–ում տեղադրվեն «Փրկենք ադրբեջանցի պատանդներին» հաղորդմամբ տարբեր լեզուներով հեշթեգեր։ Բայց քարոզիչներին չհաջողվեց հասնել անհրաժեշտ արդյունքի, և այդ ամենն այդպես էլ դուրս չեկավ նեղ շրջանակներից»,– նշեց Մարտիրոսյանը։
Փորձագետն ավելացրեց նաև, որ պետք է պաշտպանել հայկական կայքերն ադրբեջանցի հաքերներից։ «Ներկայում մեր պաշտպանությունը շատ թույլ է։ Օրինակ` վերջին երկու ամիսների ընթացքում ադրբեջանցի հաքերների գրոհի են ենթարկվել հայկական երկու բանկերի կայքեր»,– ավելացրեց Մարտիրոսյանը։ -0-
Ծանոթացեք լուրերին առաջինն ու քննարկեք դրանք մեր Telegram-ում
17:57 03.11.2014