Ռուսական մանկապարտեզներում կփորձեն պայքարել ինտերնետային կախվածության դեմ
ԵՐԵՎԱՆ, 26 օգոստոսի. /ԱՌԿԱ/. Մոսկվայի մանկապարտեզներում ինտերնետային կախվածության կանխարգելման դասեր կանցկացվեն։ Ինչպես գրում է Lenta.ru-ն, այդ մասին m24.ru–ին հաղորդել է Մոսկվայի քաղաքային դումայի կրթության հանձնաժողովի անդամ Նադեժդա Պերֆիլովան։
Նրա խոսքով` նախադպրոցական հաստատություններում նման պարապմունքներ անցկացնելու առաջարկը կքննարկեն Մոսկվայի քաղաքային դումայի աշնանային նստաշրջանում գործադիր իշխանության ներկայացուցիչների և փորձագետների հետ։
Ենթադրվում է, որ ավագ խմբերում դասերը կվարեն հոգեբանները, որպեսզի պարզեն, թե երեխաների մոտ կա արդյոք անառողջ ձգտում համակարգչի նկատմամբ, թե ոչ։ Բացի այդ, մասնագետները կարող են պարապմունք անցկացնել նաև երեխաների ծնողների համար։
«Ծնողներին պետք է համոզել, որ նրանք վախենան իրենց երեխաների ապագայի համար։ Պետք է ընտանիքներ գտնել, որտեղ արդեն կա այդ խնդիրը»,– պարզաբանել է Պերֆիլովան։ Նրա խոսքով` մեծահասակները հաճախ իրենք են սմարթֆոնները տալիս երեխաներին, որպեսզի ինչ–որ կերպ զբաղեցնեն նրանց։
«Առայժմ չկա համակարգչային կախվածությունից բուժման գործող մեթոդաբանություն, սակայն դա կարելի է կանխել վաղ փուլում»,– ասել է պատգամավորը։
m24.ru–ն մեջբերում է կախվածության հիմնական նախանշանները` ապասոցիալականացում և զգացմունքային օտարացում, առաջադիմության նվազում, տրամադրության հաճախակի փոփոխություններ, հիշողության և ուշադրության վատացում, ֆոբիաների առաջացում։
Մոսկվայի դպրոցներում նոր ուսումնական տարվա սկզբին անվտանգ սելֆիի դասեր կկազմակերպվեն։-0-
Ծանոթացեք լուրերին առաջինն ու քննարկեք դրանք մեր Telegram-ում
14:52 26.08.2015
