«ՎԿոնտակտեն» մտադիր է օգտատերերի միջև դրամական փոխանցումների ֆունկցիա գործարկել
ԵՐԵՎԱՆ, 29 օգոստոսի. /ԱՌԿԱ/. «ՎԿոնտակտե» սոցիալական ցանցը մտադիր է մինչև տարեվերջ օգտատերերի միջև դրամական փոխանցումների հնարավորություն գործարկել, գրում է «Իզվեստիա» թերթը` հղում անելով սոցիալական ցանցի ծրագրերին ծանոթ աղբյուրին:
Պարբերականի տվյալներով, ֆունկցիան հասանելի կլինի ինչպես վեբ տարբերակում, այնպես էլ բջջային հավելվածում, իսկ փոխանցում հնարավոր կլինի կատարել ցանկացած բանկային քարտի միջոցով: Ընդ որում, փոխանցում կատարելու համար օգտատերը պարտավոր չէ իմանալ ստացողի քարտի համարը` գումարը կարելի է ուղարկել կոնկրետ մարդու անունով, ով կցել է իր քարտը սոցիալական ցանցի իր էջին: Թե ինչպիսին է լինելու ծառայության միջնորդավճարը, հայտնի չէ, գրում է newsru.com-ը:
Հիշեցնենք, որ փետրվարի սկզբին միջոցների փոխանցման սեփական ծառայությունն էր գործարկել «Օդնոկլասնիկի» սոցիալական ցանցը` «ՎՏԲ 24» բանկի հետ միասին: Ծառայության ակտիվացման համար անհրաժեշտ է կցել քարտը սոցիալական ցանցի պրոֆիլին, իսկ մեկ անգամով փոխանցվող գումարը կարող է կազմել 500-ից մինչև 75 հազար ռուբլի:
«Օդնոկլասնիկիի» մամուլի ծառայության ղեկավար Անաստասիա Ժբանովայի խոսքով, սոցիալական ցանցի ներսում քարտից քարտ փոխանցումները տարածված են, իսկ փոխանցվող միջին գումարը կազմում է 4 հազար ռուբլի: Նա նաև նշել է, որ ծառայության գործարկումից որոշ ժամանակ անց, օգտատերերի խնդրանքով դրանում ավելացվել է միջազգային փոխանցումների հնարավորությունը: -0-
Ծանոթացեք լուրերին առաջինն ու քննարկեք դրանք մեր Telegram-ում
20:45 29.08.2016