Wikipedia–ի կայքում մեկնարկել է «Մեկ հայ` մեկ հոդված» նախագիծը
ԵՐԵՎԱՆ, 27 մարտի. /ԱՌԿԱ/. Wikipedia վիրտուալ հանրագիտարանի կայքում մեկնարկել է «Մեկ հայ` մեկ հոդված» նախագիծը, հինգշաբթի մամուլի ասուլիսի ընթացքում տեղեկացրել է Wikimedia Armenia գիտակրթական հասարակական կազմակերպության նախագահ Սուսաննա Մկրտչյանը։
«Մեր նախաձեռնության նպատակն է հարստացնել Wikipedia վիրտուալ հանրագիտարանը հայալեզու բարձրորակ նյութերով` նախագծում ներգրավելով բնակչության լայն շերտերին», – ասել է նա։
Մկրտչյանի խոսքերով` ծրագրի էությունն այն է, որ աշխարհի ցանկացած կետում բնակվող հայը տեղադրի գոնե մեկ հայալեզու հոդված Wikipedia–ում։ Միաժամանակ նա պարզաբանել է, որ ակցիային արդեն միացել են մի շարք քաղաքական գործիչներ, երգիչներ և դերասաններ, որոնց թվում են ՀՀ պաշտպանության նախարար Սեյրան Օհանյանը, հեռուստահաղորդավարուհի Գայանե Ասլամազյանը, ռեժիսոր և դերասան Սերժ Ավետիքյանը և հայտնի դրամատուրգ, մշակույթի նախկին փոխնախարար Կարինե Խոդիկյանը։
Պատմելով, որ ծրագիրը մեկնարկել է մարտի 24 –ին «Արմենիա» հեռուստաալիքով հեռարձակվող «Մարդկային գործոն» հաղորդաշարի ժամանակ` Մկրտչյանը տեղեկացրել է, որ երեք օրվա ընթացքում Wikipedia կայքում հայկական կոնտենտում ստացվել է մոտ 360 հայալեզու հոդված, որոնք վերաբերում են տարբեր ոլորտների։
Միաժամանակ նա նշել է, որ կայքի հայալեզու կոնտենտում ամենաքիչ թվով նյութեր կան կրթության, ֆիզիկայի, քիմիայի և մաթեմատիկայի ոլորտներում։
«Բացի այդ, ինչպես հայտնի է, մոտենում է Հայոց ցեղասպանության 100–ամյա տարելիցը, և մենք կցանկանայինք, որպեսզի մեր հայրենակիցները ակտիվություն դրսևորեն և բարձրորակ հոդվածներ տեղադրեն բոլոր հայերին հուզող այդ թեմայի վերաբերյալ», – ավելացրել է նա։
Հիշեցնելով, որ հուլիսի 1–ին լրանում է Wikipedia–ի հայալեզու տարբերակի ստեղծման 10–ամյակը` Մկրտչյանը հույս է հայտնել, որ այդ նախաձեռնությունը հարմար առիթ կդառնա այդ հոբելյանն արժանապատվորեն նշելու համար։
Նախագծի շրջանակներում նախատեսվում է կազմակերպել բազմաթիվ միջոցառումներ, այդ թվում` վիքիհանդիպումներ և սեմինարներ հայտնի գիտնականների, գրողների, նկարիչների, դերասանների և այլ ոլորտի գործիչների մասնակցությամբ` վիքիմշակույթի հետ ծանոթանալու և հայկական Վիքիպեդիայի հնարավորությունների հարստացման համար նրանց հնարավորություններն օգտագործելու նպատակով։
Wikimedia Armenia կազմակերպության ներկայացուցիչ Մհեր Բեքարյանն իր հերթին նշեց, որ նախաձեռնության շրջանակներում նախատեսվում է հետագայում վիքիակումբ բացել Գյումրիում, որը ևս կխթանի Հայաստանի մեծությամբ երկրորդ քաղաքի բնակիչներին ակտիվորեն մասնակցել Wikipedia վիրտուալ հանրագիտարանի հայկական կոնտենտի ձևավորման գործում։
Կազմակերպիչները կոչ արեցին հայկական սփյուռքի ներկայացուցիչներին և միանալ այս նախաձեռնությանը`վիրտուալ հանրագիտարանի կայքում տեղադրելով նաև արևմտահայերեն հոդվածներ։–0–
Ծանոթացեք լուրերին առաջինն ու քննարկեք դրանք մեր Telegram-ում
17:44 27.03.2014