Հայաստանը շուտով կհայտնվի աշխարհի թոփ 10 երկրների ցանկում բնակչությանն ընկնող ընկերությունների թվով.Եսայան
ԵՐԵՎԱՆ, 18 հոկտեմբերի./ԱՌԿԱ/. Հայաստանը շուտով կհայտնվի աշխարհի թոփ 10 երկրների ցանկում բնակչությանն ընկնող ընկերությունների թվով, ինչի շնորհիվ կհաջողվի բարձրացնել օտարերկրյա ներդրողների և բիզնեսի հետաքրքրությունը։ Այս մասին հայտարարեց Team Telecom Armenia ընկերության համահիմնադիր, Առաջատար տեխնոլոգիաների ձեռնարկությունների միության նախագահ Ալեքսանդր Եսայանը։
Նա նշեց, որ Հայաստանի հույսը մտավոր ներուժն է։ Եսայանը հայտարարեց, որ երկիրն այսօր գտնվում է այն փուլում, որում հայկական տեխնոլոգիական ընկերությունները խաղում են շատ մեծ դեր և արդյունքներ են գրանցում միջազգային հարթակներում։ Այդ ամենը, նրա խոսքով, հնարավոր դարձավ բազմաթիվ գործոնների շնորիվ` անցյալի հիմք, ինտելեկտ, բիզնես ճկունություն։
«Այսօր Հայաստանում կան մի քանի ընկերություններ, որոնք մոտակա մի քանի տարվա ընթացքում կդառնան unicorn ընկերություններ (ընկերություններ, որոնք 1մլրդ դոլարից ավել արժեն), բայց կան պոտենցիալ ունեցող ևս մի քանի ընկերություններ, որոնք այդ շեմը կհատեն։ Դա Հայաստանի համար նշանակում է, որ մենք կարող ենք մեր երկիրը դասել թոփ երկրների շարքում. 3մլն բնակչությամբ ունենք 3 մլրդ դոլար արժողությամբ ընկերություն, այդ պատճառով մենք ավելի բարձր տեղ ենք զբաղեցնում քան ավելի շատ բնակչություն ունեցող երկրները, որոնք ընդամենը 10 unicorn ընկերություն ունեն», – պարզաբանեց նա։
Եսայանը հայտարարեց, որ Հայաստանն այսօր շատ լավ դիրքավորված է IT ոլորտում, և պետք է ապահովել դրա շարունակակությունը և մեծացնել մասշտաբայնությունը։
Եսայանը նշեց, որ այսօր Հայաստանում ինտերնետը զարգացած է, բայց զարգացնելու տեղ կա սահմանամերձ գյուղերում, որտեղ բնակչության խտության պատճառով օպտիկամանրաթելային ցանցերը շատ զարգացած չեն։
«Կարծում եմ` մեր ընկերության համար ռազմավարական նշանակություն ունի հենց այն, որ կարողանանք զարգացնել հասանելիությունը գյուղերում, այսինքն օպտիկամանրաթելային ինտերնետը հասանելի լինի ոչ թե միայն մեր քաղաքներում և մեծ գյուղերում, այլ ընդհանուր Հայաստանի Հանրապետության բոլոր բնակավայրերում», – ասաց նա։
Նա նշեց, որ այդ ծրագիրն արդեն գործարկվել է, և հույս հայտնեց, որ մեկ տարում Երևանն ամբողջությամբ կվերազինվի նոր` աշխարհում ամենաարագ ցանցով, որը հնարավորություն կտա ապահովել 25ԳԲ թողունակություն։
Պատասխանելով այն հարցին, թե 10 տարվա կտրվածքով այս ոլորտին ինչ է սպասվում` Եսայանը նշեց, որ այսօր տենդենցը հեռախոսից, որպես կոմունիկացիայի միջոց, գնում է դեպի սարքեր, օրինակ` սառնարանն է միացված ինտերնետին, տան փոշեկուլն է միացված ինտերնետին, լույսերը, վարագույները, որոնք ամբողջութամբ կառավարվում են ցանցի միջոցով։
«Տեխնոլոգիաներն ունեն իրենց դերն ամեն ինչի մեջ, բարձրացնում են էֆեկտիվությունը։ Եթե մենք փոքր երկիր ենք` թե տարածքով, թե բնակչությամբ, պետք է մի շնչին ընկնող օգտակար գործոնն անգամ 10 անենք, անգամ 30 անենք, որպեսզի բարեկեցիկ ապրենք», – ասաց նա։–0–
Ծանոթացեք լուրերին առաջինն ու քննարկեք դրանք մեր Telegram-ում
19:37 18.10.2021
