ԵՐԵՎԱՆ, 18 ապրիլի. /ԱՌԿԱ/. ՀՀ կառավարությունը 2012թ.–ին 80 մլն դրամ կուղղի տեղեկատվական տեխնոլոգիաների ոլորտի ծառայությունների խթանման ծրագրերի և միջոցառումների իրականացմանը, հայտնեց ՀՀ էկոնոմիկայի նախարարի պաշտոնակատար Տիգրան Դավթյանը։

ՀՀ կառավարությունը հինգշաբթի կայացած նիստի ժամանակ հաստատեց տեղեկատվական տեխնոլոգիաների ոլորտի ծառայությունների խթանման  ծրագրերը և միջոցառումների ցանկը։

«Այդ միջոցները կուղղվեն Հայաստանի ՏՏ ոլորտն արտերկրում ներկայացնելուն, ցուցահանդեսների կազմակերպմանը, հետազոտությունների անցկացմանը։ Երկրորդ ուղղությունը միջազգային համագործակցությունն է, որի նպատակն է խթանել արտասահմանյան ներդրումները, նոր աշխատատեղեր ստեղծել, կիրառել լավագույն համաշխարհային փորձը և այլն»,– ասաց Դավթյանը` ներկայացնելով միջոցառումների ծրագիրը։

Ըստ նրա` միջոցառումները կիրականացվեն մասնավոր հատվածի հետ համագործակցությամբ` 50/50 ֆինանսավորման տոկոսային հարաբերակցությամբ։

Նա տեղեկացրեց, որ ընթացիկ տարում նախատեսվում է Intel, Cisco, National Instruments, Nokia և այլ անդրազգային ընկերությունների հետ համատեղ ծրագրերի իրականացումը։

2000թ.-ին ՀՀ կառավարությունը ՏՏ ոլորտն առաջնահերթ հայտարարեց երկրի տնտեսության համար: Այսօրվա դրությամբ Հայաստանի ՏՏ ոլորտում գործում է շուրջ 350 ձեռնարկություն, որտեղ աշխատում է շուրջ 10 հազար աշխատակից:

Ըստ UITE տվյալների` Հայաստանի տեղեկատվական տեխնոլոգիաների ոլորտը 2012թ.-ի արդյունքներով, 2011թ.-ի համեմատ, 25 տոկոսանոց աճ է գրանցել՝ կազմելով 250 մլն դոլար:--0--

Ծանոթացեք լուրերին առաջինն ու քննարկեք դրանք մեր Telegram-ում

16:49 18.04.2013