ՀԾԿՀ –ն ՈՐՈՇՈՒՄ Է ԸՆԴՈՒՆԵԼ ԴԱԴԱՐԵՑՆԵԼ ՄԻ ՇԱՐՔ ՌԱԴԻՈՀԱՃԱԽԱԿԱՆՈՒԹՅՈՒՆՆԵՐԻ ՕԳՏԱԳՈՐԾՈՒՄԸ 25 ՏԱՔՍԻ ԾԱՌԱՅՈՒԹՅԱՆ ԿՈՂՄԻՑ

ԵՐԵՎԱՆ, 1 հուլիսի. /ԱՌԿԱ/. ՀՀ Հանրային ծառայությունները կարգավորող հանձնաժողովը չորեքշաբթի որոշում է ընդունել դադարեցնել մի շարք ռադիոհաճախականությունների օգտագործումը 25 տաքսի ծառայությունների կողմից: 

Ինչպես հարցը ներկայացնելիս ասաց ՀԾԿՀ հեռահաղորդակցության վարչության պետ Գևորգ Գևորգյանը, տաքսի-ծառայությունների սեփականատերերը պետք է ժամանակին դիմեին համապատասխան ռադիոհաճախականությունները ստանալու համար և 850 հազար դրամի չափով վճարում կատարեին, ինչից հետո տարեկան 200 հազարական դրամ վճարեին ռադիոհաճախականությունը պահելու համար:

«Սակայն տաքսի-ծառայությունների սեփականատերերը կամ համապատասխան թույլտվությունը ստանալու համար չեն դիմել, կամ անհրաժեշտ գումարը չեն վճարել, և ռադիոհաճախականությունները շարունակել են օգտագործել արդեն ապօրինաբար»,- աասց Գևորգյանը:

Ինչպես նշեցին նիստին ներկա տաքսի ծառայությունների ներկայացուցիչները, իրենք բոլորն արդեն համապատասխան դիմումները ներկայացրել են ՀԾԿՀ և պատրաստ են մուծել անհրաժեշտ գումարը ռադիոհաճախականության օգտագործման համար:  

Ընդ որում նրանք ընդգծեցին, որ ճգնաժամի պայմաններում ռադիոհաճախականության անջատումը կարող է ընկերությունների փակման ու ծառայությունների ապակազմավորման հանգեցնել:

Տվյալ առնչությամբ ՀԾԿՀ-ն համաձայնեց արտոնագրման գործընթացը արագացված կարգով անել, 3-10 օրվա ընթացքում:-0-

 

Ծանոթացեք լուրերին առաջինն ու քննարկեք դրանք մեր Telegram-ում

00:08 03.07.2009