ՀՀ ՀԿԾՀ-ն սակագին է սահմանել բջջային ցանցերում միջազգային մուտքային զանգերի տերմինացիայի համար

ԵՐԵՎԱՆ, 10 սեպտեմբերի. /ԱՌԿԱ/. ՀՀ հանրային ծառայությունները կարգավորող հանձնաժողովը չորեքշաբթի նիստի ժամանակ սակագին է սահմանել Հայաստանի բջջային ցանցերում բջջային կապի միջազգային մուտքային զանգերի համար:

Ինչպես տեղեկացրեց հարցով զեկուցող, ՀՀ ՀԿԾՀ հեռահաղորդակցությունների բաժնի պետ Գևորգ Գևորգյանը, սակագինը կկազմի մեկ րոպեի դիմաց 40 դրամ՝ առանց ԱԱՀ-ի, և ուժի մեջ կմտնի 2009 թ.-ի հոկտեմբերի 1-ից մինչև 2010 թ.-ի հունվարի 1-ը:

«Էլեկտրոնային հաղորդակցության շարժական բջջային կապի ցանցերում միջազգային մուտքային զանգերի ծառայության դիմաց վճարը վերաբերում է Հայաստանում գործող երեք հեռահաղորդակցական օպերատորներին՝ «ԱրմենՏելին» (ապրանքանիշը՝ beeline), «Ղ-Տելեկոմին» (ապրանքանիշը՝ VivaCell-MTS) և «Orange Armenia»-ին՝ (France Telecom ընկերության ապրանքանիշը)», - ասել է Գևորգյանը:

ՀՀ հանրային ծառայությունները կարգավորող հանձնաժողովը 2009 թ.-ի օգոստոսի 19-ին որոշում է ընդունել հայկական բջջային օպերատորների փոխկապակցված սակագների սահմանման մասին, որը ուժի մեջ կմտնի 2010 թ.-ի հունվարի 1-ից:

2011 թ.-ի հուլիսի 1-ից նախատեսված է օգտագործել 11,4 դրամի չափով միասնական սակագին, իսկ բջջային կապից Երևանի ֆիքսված ցանցի համար սահմանված սակագինը կկազմի 9 դրամ, միաժամանակ արտասահմանից մուտքային զանգերի սակագինը կկազմի 12 ցենտ:

Այժմ բջջային կապի հայկական շուկայում գործում է երկու ընկերություն՝ «ԱրմենՏելը», որը 100 տոկոսով պատկանում է ռուսական «ՎիմպելԿոմին» և VivaCell-MTS-ը, որի բաժնետոմսերի վերահսկիչ փաթեթի սեփականատերն է ռուսական МТС ընկերությունը:

Երրորդ բջջային օպերատորը՝ «Orange Armenia»-ն, որը France Telecom-ի 100 տոկոսանոց դուստրն է (ապրանքանիշը՝ Orange) արդեն ստացել է վերջնական արտոնագիրը, սակայն մտադիր է ցանցը հանել կոմերցիոն շահագործման 2009 թ.-ի աշնանը:-0-

Ծանոթացեք լուրերին առաջինն ու քննարկեք դրանք մեր Telegram-ում

22:07 10.09.2009