ՀԱՅԱՍՏԱՆԻ ՀԾԿՀ-Ն ՄԻՋԱԶԳԱՅԻՆ ԱԶԴԱԿՆԵՐԻ ՀԱՆԳՈՒՅՑԻ ԿՈԴԻՆ ՄԻԱՑՄԱՆ ԼԻՑԵՆԶԻԱ Է ՏՐԱՄԱԴՐԵԼ ՀԱՅԿԱԿԱՆ ՀԻՆԳ ԸՆԿԵՐՈՒԹՅՈՒՆՆԵՐԻ
ԵՐԵՎԱՆ, 8 հոկտեմբերի. /ԱՌԿԱ/. Հայաստանի հանրային ծառայությունները կարգավորող հանձնաժողովը չորեքշաբթի նիստում միջազգային ազդակների հանգույցի կոդին (International Signalling Point Code, ISPC) միացման լիցենզիա է տրամադրել հայկական հինգ ընկերությունների։
Էլեկտրակապի միջազգային միությունը (ԷՄՄ) ՀԾԿՀ համաձայնագրին համապատասխան՝ Հայաստանին ISPC (International Signalling Point Code) կոդեր է տրամադրում նոր օպերատորների՝ միջազգային ասպարեզ դուրս գալու համար։
Ինչպես «ԱՌԿԱ» գործակալությանը հայտնեց ՀԾԿՀ հեռահաղորդակցության վարչության պետ Գևորգ Գևորգյանը, տրամադրած կոդերին համապատասխան՝ հանձնաժողովն այսօր բավարարել է «Բիոնետ», «Ձորաղբյուր համալիր», «Նեթսիս», «Կրոսնետ» և «Գլոբալ Քոլլայն» ընկերությունների հայտերը՝ տրամադրելով նրանց ISPC համապատասխան կոդեր։
Մասնավորապես, «Բիոնետ» ընկերությանը տրամադրվում է միջազգային ազդակների հանգույցի 5-234-2, «Կրոսնետին»՝ 5-234-3, «Ձորաղբյուր համալիրին»՝ 5-234-4, «Նեթսիսին»՝ 5-234-5 և «Գլոբալ Քոլլայնին»՝ 5-234-6 կոդերը։
«Ընկերություններն արդեն ունեցել են օպերատորական ոչ աշխարհագրական կոդեր, ինչպես նաև այդ կոդերին համապատասխան համարներ և ցանցերի օգտագործամն լիցենզիաներ, իսկ ISPC կոդերի տրամադրումը հնարավորություն կընձեռի նրանց անցնել լիարժեք գործունեության և կապի ծառայությունների տրամադրման»,- ասաց Գևորգյանը։
Միաժամանակ, ինչպես կարծում են ընկերությունների ներկայացուցիչները, հանձնաժողովի որոշումը նպաստում է հեռահաղորդակցության ոլորտի զարգացմանը երկրում։
Նիստի ընթացքում ՀԾԿՀ-ն նաև համարներ և 6041 ոչ աշխարհագրական կոդ է տրամադրել «Գլոբալ Քոլլայն» ընկերությանը՝ ֆիքսված հեռախոսակապի ծառայությունների տրամադրման նպատակով։
2009 թվականի փետրվարի 25-ին ՀԾԿՀ-ն թույլատրել էր «Բիոնետ» և «Ձորաղբյուր համալիր» ընկերություններին զբաղեցնել, համապատասխանաբար, 6029 և 6028 ոչ աշխարհագրական կոդերը։ Հանձնաժողովի՝ 2009 թվականի մարտի 25-ի որոշման համաձայն՝ ոչ աշխարհագրական կոդեր են ստացել նաև «Նեթսիս» (6037) և «Կրոսնետ» (6039) ընկերությունները։ -0-
Ծանոթացեք լուրերին առաջինն ու քննարկեք դրանք մեր Telegram-ում
21:01 08.10.2009