IP-հեռախոսակապի հայկական ընկերություններն այսուհետ չեն կարող ելքային զանգեր կատարել. ՀԾԿՀ
ԵՐԵՎԱՆ, 2 փետրվարի. /ԱՌԿԱ/. Հայաստանի հանրային ծառայությունները կարգավորող հանձնաժողովի որոշմամբ՝ միջազգային հեռախոսազանգերի (IP-հեռախոսակապ) ծառայություններ տրամադրող հայկական ընկերություններն այսուհետ չեն կարող ելքային զանգեր կատարել, «ԱՌԿԱ» գործակալությանը ասաց ՀԾԿՀ-ի հեռահաղորդակցության վարչության պետ Գևորգ Գևորգյանը:
«Պատճառն այն է, որ գրանցվել են դեպքեր, երբ համարներով իրականացվել է միջազգային զանգերի անօրինական տերմինացում: Այդ պատճառով որոշվել է թույլատրել միայն միակողմանի՝ մուտքային զանգեր», - ասաց Գևորգյանը:
Նրա խոսքերով՝ եթե ընկերությունը բավարար հիմունքներ ներկայացնի, որ առանց ելքային զանգերի նրանք չեն կարողանա իրականացնել իրենց գործունեությունը ըստ արտոնագրի, ապա հանձնաժողովը հնարավոր է՝ թույլատրի ապարգելափակել ելքային զանգերը:
«Այս որոշումը ընկերությունների գործունեության համար սահմանափակում կամ խոչընդոտ չէ: Հակառակը՝ այն թույլ կտա խուսափել խարդախություններից», - նշեց վարչության պետը:
Նա ավելացրեց, որ դեպքերի մեծամասնության ժամանակ ընկերություններին հարկավոր չեն ելքային զանգերը, քանի որ քաղաքացիներն իրենք են զանգում ընկերություն, և նրանք ինտերնետի միջոցով միացնում են միջազգային համարներին:
ՀԾԿՀ-ի տվյալների համաձայն՝ Հայաստանում ավելի քան 60 ընկերություն IP-հեռախոսակապի ծառայություններ տրամադրելու արտոնագիր ունի: Այս ոլորտի արտոնագրերը տրամադրվում են հանձնաժողովի կողմից պարզեցված կարգով:
VoIP-ը (Voice-over-IP կամ IP-հեռախոսակապ) կապի համակարգ է, որը խոսքային ազդանշանի փոխանցում է ապահովում ինտերնետի կամ ցանկացած այլ IP-ցանցի միջոցով:-0-
Ծանոթացեք լուրերին առաջինն ու քննարկեք դրանք մեր Telegram-ում
18:59 02.02.2011