ՀՀ ՏՄՊՊՀ–ն խիստ նկատողություն է ներկայացրել 14 ընկերությունների, որոնք չարտոնագրված ծրագրային ապահովում են առաջարկում

ԵՐԵՎԱՆ, 15 նոյեմբերի. /ԱՌԿԱ/. ՀՀ տնտեսական մրցակցության պաշտպանության պետական հանձնաժողովը (ՏՄՊՊՀ) ուրբաթ կայացած նիստի ընթացքում խիստ նկատողություն է ներկայացրել 14 ընկերություններին, որոնք չարտոնագրված ծրագրային ապահովում են առաջարկում։

ՏՄՊՊՀ–ի կողմից խիստ նկատողություն են ստացել «IT Master», «NIX Computers», «LED Computers», «AG electronics», «ONLINE PLUS», «HARD POWER SYSTEMS», «FULLOPSYS»,«IT Plasa», «Compass», «LANZA», «SP tech Computers», «SMART SHOP», «FREEGATE», «Ստատուրա» խանութները։

Microsoft ընկերությունը ՏՄՊՊՀ է ներկայացրել իր հեղինակային իրավունքները խախտելու մասին դիմում, ինչպես նաև Ծրագրային ապահովման արտադրողների ասոցիացիայի (BSA - Business software alliance) կողմից Երևանի 58 խանութներում անցկացրած դիտարկման արդյունքները, որոնք հեղինակային իրավուքների և ցանցահենային ծրագրային ապահովման վաճառքի բազմաթիվ խախտումներ են հայտնաբերել։ ՏՄՊՊՀ–ի անցկացրած հետազոտությունները հաստատել են մի շարք ընկերություններում չարտոնագրված ծրագրային ապահովման առկայության փաստը։

«Հետազոտության արդյունքում պարզվեց, որ շատ խանութներ համակարգչային տեխնիկա են վաճառում չարտոնագրված ծրագրային ապահովմամբ` առանց սպառողին տեղյակ պահելու այդ մասին»,– նիստի ընթացքում հայտնեց ՏՄՊՊՀ նախագահ Արտակ Շաբոյանը։

Ինչպես տեղեկացրեց Շաբոյանը, ընկերություններին խիստ նկատողություն է ներկայացվել խախտումները վերացնելու հանձնարարությամբ։ Բացի այդ, տվյալ հետազոտություններն առաջիկայում կուղարկվեն ոստիկանություն, քանի որ նման խախտումների դիմաց նաև քրեական պատասխանատվություն է նախատեսված։

«Մենք բողոքներ ենք ստացել մեր բարեխիղճ գործընկերներից, որ արտոնագրված արտադրանք ներկայացնելով, անհնար է մրցակցել շուկայում անբարեխիղճ տնտեսական սուբյեկտների դեմ»,– ՏՄՊՊՀ–ի նիստի ընթացքում հայտնեց Հայաստանում Microsoft ներկայացուցչության տնօրեն Գրիգոր Բարսեղյանը։

Ըստ նրա, չարտոնագրված ծրագրային ապահովումն իր հետ բերում է նաև տեխնիկական, ֆինանսական և իրավական ռիսկեր և կարող է համակարգիչներից տվյալների կորուստների սպառնալիք դառնալ։

BSA–ի տվյալների համաձայն, Հայաստանում ցանցահենության մակարդակը 2006թ.–ին հասել է 96–98 տոկոսի, իսկ 2012թ.–ին հրապարակված վերջին տվյալների համաձայն`87 տոկոսի։ –0–

Ծանոթացեք լուրերին առաջինն ու քննարկեք դրանք մեր Telegram-ում

16:34 15.11.2013