ՀԾԿՀ-ն հաստատել է հեռախոսասարքերի և պլանշետների ապակոդավորման ապահովման կանոնները
ԵՐԵՎԱՆ, 1 փետրվարի. /ԱՌԿԱ/. Հանրային ծառայությունները կարգավորող հանձնաժողովը ուրբաթ նիստի ժամանակ հաստատել է հեռախոսասարքերի և պլանշետների ապակոդավորման ապահովման կանոնները։
Որոշման համաձայն` սույն կանոնները սահմանում են հանրային էլեկտրոնային հաղորդակցության շարժական կապի ցանցի օպերատորի կողմից շարժական կապի հեռախոսասարքերը և պլանշետները միայն իր շարժական կապի ցանցում օգտագործելու սահմանափակման վերացման ապահովման պայմաններն ու կարգը:
Կանոններում նշվում է, որ օպերատորը որոշակի ժամկետով բաժանորդագրման պարտավորությամբ առաջարկվող սարքերի հետ միաժամանակ, որպես այլընտրանք առաջարկում է նաև այդ սարքերի ապակոդավորված շուկայական արժեքով տարբերակը: Օպերատորը կոդավորված սարքի վաճառքի պահին ծանուցում է բաժանորդին տվյալ սարքի ապակոդավորման հնարավորության մասին: Ապակոդավորման պայմանների վերաբերյալ օպերատորը բաժանորդին նախապես տեղեկացնում է բաժանորդային պայմանագրերի, գործառնական գրասենյակների և պաշտոնական ինտերնետային կայքի միջոցով:
Ինչպես նշվում է ՀԾԿՀ որոշման մեջ, օպերատորի կողմից որոշակի ժամկետով բաժանորդագրման պարտավորության դեպքում առաջարկվող սարքի ապակոդավորումն օպերատորն իրականացնում է բաժանորդի կողմից պայմանագրային պարտավորությունների կատարման դեպքում գրավոր դիմումի հիման վրա, անվճար՝ առավելագույնը 2 աշխատանքային օրվա ընթացքում:
Օպերատորի կողմից առանց բաժանորդային պայմանագրի առաջարկվող սարքի ապակոդավորումն օպերատորն իրականացնում է բաժանորդի գրավոր դիմումի հիման վրա, անվճար՝ առավելագույնը 2 աշխատանքային օրվա ընթացքում: Այն սարքերը, որոնց ապակոդավորումը սարք արտադրողի կողմից 2 աշխատանքային օրվա ընթացքում հնարավոր չէ իրականացնել, օպերատորի կողմից ապակոդավորումն ապահովվում է առավելագույնը 5 աշխատանքային օրվա ընթացքում:
Սույն որոշումն ուժի մեջ է մտնում 2014 թվականի մարտի 1-ից:
Հայկական շուկայում գործում է բջջային կապի երեք օպերատոր` «ԱրմենՏելը» (ապրանքանիշը` Beeline, «ՎիմպելԿոմ» ռուսական ընկերության 100 տոկոսանոց դուստրը), Վիվասել–ՄՏՍ–ը («Մոբիլնիե Տելեսիստեմի» (ՄՏՍ) ռուսական օպերատորի դուստր ընկերություն) և Օրանժ Արմենիան (Ֆրանս Տելեկոմի դուստր ընկերություն)։–0–
Ծանոթացեք լուրերին առաջինն ու քննարկեք դրանք մեր Telegram-ում
15:57 01.02.2014
