Երկու հայկական ընկերություններ ինտերնետ–ծառայություններ կմատուցեն ՀՀ Շիրակի և Գեղարքունիքի մարզերում
ԵՐԵՎԱՆ, 4 դեկտեմբերի. /ԱՌԿԱ/. ՀՀ հանրային ծառայությունները կարգավորող հանձնաժողովը չորեքշաբթի կայացած նիստի ընթացքում 10 տարի ժամկետով ինտերնետ–ծառայությունների տրամադրման արտոնագիր է տրամադրել «Ինտերնետ կոմունիկացիոն ցանցեր» ՍՊԸ–ին և «Հինգշաբթի» ՍՊԸ–ին։
Ըստ ՀԾԿՀ հեռահաղորդակցության վարչության պետ Գևորգ Գևորգյանի, անլար հասանելիության լայնաշերտ ցանցի կազմակերպման համար «Ինտերնետ կոմունիկացիոն ցանցեր» ընկերությանը տրամադրվել է 5665-5670ՄՀց ռադիոհաճախականությունների հատվածի օգտագործման թույլտվություն` 10 տարի գործողության ժամկետով։
«Ընկերությունը ՀՀ Գեղարքունիքի մարզում անլար լայնաշերտ ինտերնետ–հասանելիություն ապահովելու հնարավորություն է ստանում»,– ասաց Գևորգյանը։
Արտոնագրի համաձայն, ընկերությունը պարտավորվում է անլար լայնաշերտ ինտերնետ–հասանելիություն ապահովել` տվյալների փոխանցման 300 ՄԲ/վ արագությամբ։
ՀԾԿՀ–ի որոշման համաձայն, Շիրակի մարզում հանրային էլեկտրոնային հաղորդակցության ցանցի շահագործման արտոնագիր է տրամադրվել «Հինգշաբթի» ընկերությանը։
«Արտոնագրերի գործողության մեջ մտնելու պահից ընկերությունները իրավունք են ստանում և պարտավորվում են ստեղծել կամ զարգացնել հանրային էլեկտրոնային հաղորդակցության ցանց կամ կազմակերպել դրա օգտագործումը»,– նշեց ՀԾԿՀ հեռահաղորդակցության վարչության պետ Գևորգ Գևորգյանը։ –0–
Ծանոթացեք լուրերին առաջինն ու քննարկեք դրանք մեր Telegram-ում
15:36 04.12.2013
