Հայաստանի բոլոր բնակավայրերն ապահովված են բջջային կապով. ՀԾԿՀ
ԵՐԵՎԱՆ, 17 փետրվարի. /ԱՌԿԱ/. Հայաստանի բոլոր բնակավայրերն ապահովված են բջջային կապով, «ԱՌԿԱ» գործակալությանը տված հարցազրույցում հայտնեց Հայաստանի հանրային ծառայությունները կարգավորող հանձնաժողովի հեռահաղորդակցությունների վարչության պետ Գևորգ Գևորգյանը։
Նա նշեց, որ դեռ անցյալ տարի Հանձնաժողովը բջջային կապի օպերատորների հետ համատեղ մոնիտորինգ է անցկացրել, որի արդյունքներով բացահայտել է 18 բնակավայրեր, որտեղ ամբողջովին բացակայել է բջջային կապը։
Ըստ նրա` այս առիթով 2013 թվականի հունվարի 23–ին ՀԾԿՀ–ն որոշում է ընդունել, որի համաձայն` այդ կետերը տեղաբաշխվել են կապի օպերատորների միջև, որոնք պարտավոր են ապահովել բջջային ծածկույթ և բնակչությանը տրամադրել լայնաշերտ հասանելիություն։
«Այդ որոշման համաձայն` օպերատորների կողմից կատարված աշխատանքի շնորհիվ 2014 թվականի հունվարի 1–ի դրությամբ Հայաստանի բոլոր բնակավայրերն ապահովվել են բջջային կապով, միաժամանակ միայն 8.5 տոկոս բնակավայրերում հասանելի են միայն մեկ օպերատորի ծառայություններ, 23 տոկոսում` երկու օպերատորների ծառայություններ, իսկ Հայաստանի 68.5 տոկոս բնակավայրերում մատուցվում են բջջային կապի բոլոր երեք օպերատորների ծառայություններ»,– ասաց Գևորգյանը։
Նա հայտնեց նաև, որ բջջային կապի ծածկույթի ընդլայնման աշխատանքները կկրեն շարունակական բնույթ, և հետագա քայլը կլինի օպերատորներից յուրաքանչյուրի ենթակառուցվածքների ընդլայնումը դրանց ծածկույթի գոտում, ինչպես նաև յուրաքանչյուր բնակավայրում գործող օպերատորների թիվը։
ՀԾԿՀ–ն փետրվարի 5–ին հայտարարել է, որ «ԱրմենՏել», VivaCell-MTS–ը և Orange Armenia–ն կատարել են 2013 թվականի հունվարի 23–ին բջջային ցանցերի զարգացման և արդիականացման վերաբերյալ ընդունած որոշման շրջանակներում ՀԾԿՀ պարտավորությունները։
Հայկական շուկայում գործում է բջջային կապի երեք օպերատոր` «ԱրմենՏելը» (ապրանքանիշը` Beeline, «ՎիմպելԿոմ» ռուսական ընկերության 100 տոկոսանոց դուստրը), Վիվասել–ՄՏՍ–ը («Մոբիլնիե Տելեսիստեմի» (ՄՏՍ) ռուսական օպերատորի դուստր ընկերություն) և Օրանժ Արմենիան (Ֆրանս Տելեկոմի դուստր ընկերություն)։–0–
Ծանոթացեք լուրերին առաջինն ու քննարկեք դրանք մեր Telegram-ում
14:23 17.02.2014