ՀԾԿՀ–ն Ucom ընկերությանը արտոնագիր է տրամադրել Հայաստանում բջջային կապի ծառայություններ մատուցելու համար
ԵՐԵՎԱՆ, 4 նոյեմբերի. /ԱՌԿԱ/. ՀՀ հանրային ծառայությունները կարգավորող հանձնաժողովը (ՀԾԿՀ) երկուշաբթի Ucom ընկերությանը արտոնագիր է հատկացրել 801-811 ՄՀց և 842-852 ՄՀց ռադիոհաճախականությամբ բջջային կապի ծառայություններ մատուցելու համար։
Այսպիսով, Ucom ընկերությունը Հայաստանում բջջային կապի չորրորդ օպերատորը կդառնա։
ՀԾԿՀ որոշման համաձայն, արտոնագիրն ուժի մեջ է մտնում 2013թ.–ի նոյեմբերից և տրամադրվում է մինչև 2018թ.–ի օգոստոսի 6–ը ժամկետով։
Արտոնագիրն ուժի մեջ է մտնում 2013 թ.–ի նոյեմբերից և տրամադրվում է մինչև 2018 թ.–ի օգոստոսի 6–ը։ Ըստ արտոնագրի պայմանների` մեկ տարվա ընթացքում ընկերությունը պարտավոր է Երևանում և նրա հարակից տարածքներում լայնաշերտ անլար ինտերնետի ծածկույթ ապահովել։ Երկամյա ժամկետում ընկերությունը պետք է նաև նմանատիպ ցանցով ապահովի հանրապետության մարզերի 80 տոկոսը և երկրի հիմնական կապուղիները, որոնց թվում են Սևանը, Ծաղկաձորը, Ջերմուկը, Դիլիջանը, ինչպես նաև Երևանն այդ քաղաքներին կապող ուղիները, ինչպես նաև 95 տոկոսանոց ծածկույթ ապահովի Երևանն ու Ջերմուկը կապող ուղիները։ Նշված տարածքներում ընկերությունը բջջային կապի ծառայություններ մատուցելու հնարավորություն է ստանում։
Բջջային կապի ծառայությունների կոմերցիոն գործարկումը նախատեսված է 2015 թ.–ի հունվարի 1–ից ոչ շուտ։
Արտոնագիրն ընկերության համար կարժենա 6 մլրդ 225 մլն դրամ (մոտ 15.36 մլն դոլար – «ԱՌԿԱ»)։
Որոշումն ուժի մեջ է մտնում ստորագրման պահից։
Ucom (Universal Communications, ունիվերսալ կապ) ընկերությունը հիմնադրվել է 2007 թ.–ին, տրամադրում է հեռահաղորդակցության ոլորտի ծառայություններ։ Ericsson–ի աջակցությամբ ընկերությունը ստեղծել է լայնաշերտ ինտերնետ հասանելիության ցանց` տրամադրելով ինտերնետի, IP հեռուստատեսության և ֆիքսված հեռախոսակապի ծառայություններ։
Հայկական շուկայում գործում է բջջային կապի երեք օպերատոր` «ԱրմենՏելը» (ապրանքանիշը` Beeline, «ՎիմպելԿոմ» ռուսական ընկերության 100 տոկոսանոց դուստրը), Վիվասել–ՄՏՍ–ը («Մոբիլնիե Տելեսիստեմի» (ՄՏՍ) ռուսական օպերատորի դուստր ընկերություն) և Օրանժ Արմենիան (Ֆրանս Տելեկոմի դուստր ընկերություն)։–0–
Ծանոթացեք լուրերին առաջինն ու քննարկեք դրանք մեր Telegram-ում
17:30 04.11.2013